वेष्टइन्डिजमा भइरहेको आईसीसी टी–२० महिला क्रिकेटमा अपराजित यात्रा कायम राख्दै भारत सेमिफाइनलमा पुगेको छ।
बिहीबार राति आएरल्याण्डलाई ३८ रनले हराउँदै भारतले अन्तिम चारमा स्थान पक्का गरेको हो।
समूह चरणका तीनै खेल जितेका भारत अष्ट्रेलिया एक खेल अगाडिनै सेमिफाइनलमा पुगेका हुन्।
अब समूहको विजेताका लागि भारत र अष्ट्रेलियाले समूह चरणको अन्तिम खेलमा शनिबार प्रतिस्पर्धा गर्नेछन्।
बुधबार रातिको खेलमा टस हारेर पहिला ब्याटिङ गरेको भारतले निर्धारित २० ओभरमा ६ विकेट गुमाउँदै १४५ रन बनाएको थियो।
१४६ रनको लक्ष्य लिएर मैदान आएको आएरल्याण्ड भारतीय बलरसामू खुलेर खेल्न सकेन। पुरै २० ओभरमा उसले ८ विकेट गुमाउँदै ९३ रनमात्रै जोड्न सक्यो।
उसका लागि इस्बोल जोयसीले ३३ तथा कार्ले सिलङटनले २३ रन बनाउनुबाहेक अरुले दोहोरो अंकमा स्कोर गर्न सकेनन्। भारतका लागि राधा यादवले ३ तथा दिप्ती शर्माले २ विकेट लिएकी थिइन्।
यसअघि भारतीय टिमका लागि मिताली राज र स्मृति मन्धानाले पहिलो विकेटका लागि ६७ रनको साझेदारी गर्दै भारतलाई राम्रो सुरूवात दिलाएका थिए।
मितालीले जारी प्रतियोगितामा लागातार दोस्रो अर्धसतक प्रहार गर्ने क्रममा ५६ बल खेल्दै ५१ रन बनाइन्। उनले १ छक्का र चार चौका प्रहार गरेकी थिइन्। यस्तै स्मृतिले २९ बल खेल्दै १ छक्का र ४ चौकासहित ३३ रन बनाइन्। जेमिमा रोडिग्सले १८ तथा दीप्ती शर्माले ११ रन बनाउनुबाहेक अन्यले दोहोरो रनको स्कोर छुन सकेनन्।
पहिलो खेलमै न्यूजिल्याण्डविरूद्ध सतक प्रहार गर्ने कप्तान हरमनप्रीत कौर ७ रनमा आउट भइन्।
भारतले प्रतियोगिताको पहिलो खेलमा न्यूज़ील्याण्डलाई ३४ रनले हराउँदा पाकिस्तानलाई सात विकेटले हराएको थियो।
सन् २००९/१० मा आईसीसी महिला विश्व टी-२० प्रतियोगिताको सेमिफाइनलमा पुगेको भारतीय टोली यो सँगै तेस्रो पटक सेमिफाइनलमा प्रवेश गरेको हो।
