बुटवल ब्लास्टर्सलाई हराउँदै काठमाडौं रोयल्सले पोखरामा जारी पोखरा प्रिमियर लिग (पीपीएल) टी–२० क्रिकेट प्रतियोगिताको शीर्ष स्थानमा पुगेको छ।
शुक्रबार पोखरा रंगशालामा भएको दोस्रो खेलमा बुटवललाई ३७ रनले हराउँदै काठमाडौं प्लेअफ नजिक पुगेको हो।
काठमाडौंले दिएको १ सय ७३ रनको लक्ष्य पछ्याउने क्रममा बुटवल निर्धारित २० ओभरमा ९ विकेट गुमाउँदै १ सय ३५ रनमा समेटिएपछि काठमाडौंले प्रतियोगितामा चार खेलबाट तेस्रो जित निकालेको हो।
बुटवलका लागि रोहन मुस्तफाले सर्वाधिक ६१ रन बनाए। ५१ बल खेलेका उनले ५ चौका र ४ छक्का प्रहार गरेर आउट भएका थिए। सिद्धान्त लोहनीले १३, भीम सार्की १२ र चिराग सुरीले ११ रन बनाउनुबाहेक अन्यले दोहोरो रनको स्कोर छुन नसक्दा बुटवलले लगातार तेस्रो पराजय बेहोर्नुपर्यो।
काठमाडौंका लागि अमरसिंह राउटेलाले ३ तथा वसन्त रेग्मी र नन्दन यादवले २-२ विकेट लिएका थिए।
यसअघि टस जितेर पहिले ब्याटिङ गरेको काठमाडौंले निर्धारित २० ओभरमा ४ विकेट गुमाएर १ सय ७२ रन बनाएको थियो। काठमाडौंका लागि नरेश बुढाएरले बिस्फोटक ब्याटिङ गर्दै २८ बलमा ५८ रनको अविजित अर्धशतकीय इनिङ्स खेले। नरेशले ५ छक्का र ३ चौका प्रहार गरेका थिए। १३ बल खेलेका कप्तान ज्ञानेन्द्र मल्लले २ चौका र १ छक्कासहित २४ रनमा नटआउट रहे।
ओपनर जयकिसन कोल्सावालाले ४५ रन बनाउँदा गौरव तमोरले ११ रन जोडे। बुटवलका लागि रोहन मुस्ताफा र मोहम्मद संसाद शेखले १-१ विकेट लिए।
यो जितसँगै काठमाडौं अंक तालिकाको शीर्ष स्थानमा उक्लिँदै प्लेअफ सम्भावना बलियो बनाएको हो।
अब लिगको अन्तिम खेलमा काठमाडौंले भोलि घरेलु टोली पोखरा पल्टनको सामना गर्नेछ।
आज पराजित बुटवलको पनि प्लेअफ पुग्ने गणितीय सम्भावना अझै जिवितै छ। सुरूवाती दुई खेलमा उत्कृष्ट प्रदर्शन गरेको बुटवलको यो लगातार तेस्रो हार हो। हारसँगै प्लेअफ पुग्न बुटवलले अन्य खेलको नतिजामा भर पर्नु पर्नेछ।
