वेस्ट इन्डिजसँगको दुई टेस्ट श्रृंखलामाथि भारतले क्लिनस्वीप गरेको छ। पाहुना टोली वेस्ट इन्डिजलाई दोस्रो टेस्टमा १० विकेटले हराउँदै २-० ले प्रतियोगिता जितेको हो।
दोस्रो टेस्टको तेस्रो दिन ७२ रनको लक्ष्प पक्ष्याएको भारतका लागि ओपनर के.एल (लोकेश) राहुल र पृथ्वी शाले समान ३३-३३ रनमा नट आउट रहँदै सहज जित दिलाएका हुन्।
यसअघि वेस्ट इन्डिजले पहिलो इनिङ्समा ३ सय ११ रन जोड्दा भारतले ३ सय ६७ रन बनाएको थियो। पहिलो इनिङ्समा ५६ रनले पछि परेको वेस्ट इन्डिज दोस्रो इनिङ्समा १ सय २७ रनमा अल आउट भएपछि भारतले समग्रमा ७२ रनको लक्ष्य पाएको थियो।
वेस्ट इन्डिजलाई सस्तैमा समेट्न भारतका लागि उमेश यादवले पहिलो इनिङ्समा ६ तथा दोस्रो इनिङ्समा ४ विकेट लिएका थिए।
यस्तै कुलदीप यादवले पहिलो इनिङ्समा ३ तथा दोस्रो इनिङ्समा १ विकेट लिए।
यस्तै यही प्रतियोगिताबाट डेब्यू गरेका पृथ्वी शा प्रतियोगिताका म्यान अफ द सिरिज भए। पहिले खेलमै १३४ रन बनाएर सानदार डेब्यू गरेका उनले दोस्रो टेष्टको पहिलो इनिङ्समा पनि ७० रन बनाएका थिए। यस्तै दोस्रो इनिङ्समा ३३ रन बनाउँदै नट आउट रहेका उनी प्रतियोगिताकै उत्कृष्ट खेलाडी भए।
यसअघि वेस्ट इन्डिज पहिलो टेस्टमा भारतसँग २ सय ७२ रनको इनिङ्स अन्तरले पराजित भएको थियो। भारत र वेस्ट इन्डिजबीच थप ५ वान डे र ३ टी–२० क्रिकेट शृंखला हुनेछ।
पहिलो वान डे खेल अक्टोबर २१ मा गुहाटीमा हुनेछ।
