युएईमा जारी एसिया कप क्रिकेटमा आज चीरप्रतिद्वन्द्वी भारत र पाकिस्तान भिड्दै छन्। प्रतियोगिताको पाँचौं खेल दुबईस्थित दुबई अन्तर्राष्ट्रिय क्रिकेट मैदानमा स्थानीय समयअनुसार दिउँसो साढे ३ बजे सुरू हुनेछ।
खेल हेर्न पूर्वक्रिकेटर तथा पाकिस्तानका प्रधानमन्त्री इमरान खान पनि मैदानमा पुग्ने चर्चा छ।
पाकिस्तानी सञ्चारमाध्यमले कुटनीतिक स्रोतलाई उदृत गर्दै दुई दिने साउदी अरब भ्रमणमा गएका इमारन मैदानमा पुग्ने बताएका छन्।
सन् १९९२ मा पाकिस्तानले विश्वकप जित्दा इमरान पाकिस्तानी टोलीका कप्तान थिए।
साउन ११ मा पाकिस्तानी राजनीतिको कप्तानी सम्हालेका इमरान पहिलो विदेश भ्रमणका लागि मंगलबार साउदी अरब पुगेका छन्। त्यहाँबाट उनी आज आबुधावी हुँदै स्वेदश फर्कँदैछन्। त्यहाँबाट केही घन्टाका लागि उनी दुबई गएर भारत-पाकिस्तानको खेल हेर्ने चर्चा छ।
कुटनीतिक सम्बन्ध राम्रो नभएका यी दुई देशले द्वीपक्षीय श्रृंखला लामो समयदेखि खेलेका छैनन्। गत वर्षको जुनमा लण्डनमा भएको च्याम्पियन्स ट्रफीको फाइनलमा पाकिस्तानले भारतलाई १८० रनले हराएको थियो। त्यसपछि यी दुई प्रतिद्वन्द्वी पहिलो पटक भिड्न लागेका हुन्।
यी दुबै टोली हङकङलाई हराएर प्रतियोगिताको सुपर चारमा पुगिसकेका छन्। आजको खेल जित्ने टोली समूह एको विजेता हुनेछ।