मलेसियामा सम्पनन्न एशिया कप क्वालिफायर जितेर एशिया कपमा छनोट भएको हङकङले एशिया कपमा खेल्ने सबै खेललाई आइसीसीले एकदिवसीय मान्यता दिने भएको छ।
सन् २०१४ मा पहिलो पटक एकदिवसीय मान्यता पाएको हङकङले गत मार्चमा भएको विश्वकप छनोटका क्रममा नेदरल्यान्ड्ससँग प्लेअफमा पराजित हुँदै गुमाएको थियो।
हङकङले अहिलेसम्म २४ एकदिवसीय खेल खेल्दा ९ खेलमा जित निकालेको छ भने १४ खेलमा हार बेहोरेको छ। त्यस्तै एक खेलमा कुनै नतिजा आएको छैन।
आगामी सेप्टेम्वर १५ देखि २८ सम्म युएईमा हुने प्रतियोगितामा एसियाका टेष्ट खेल्ने पाँच राष्ट्र र एशिया कप क्वालिफायरबाट छनोट भएको हङकङसहित ६ देश खेल्दैछन्।
समूह चरणमा अब हङकङ ,भारत र पाकिस्तान समूह ए बाट खेल्नेछन्। यस्तै बंगलादेश, श्रीलंका र अफगानिस्तान समूह बी मा परेका छन्। दुवै समूहको शीर्ष दुई टिम सुपर ४ मा प्रवेश गर्नेछन्।
प्रतियोगिताका खेलहरु दुबई र अबुधावीमा हुनेछन् ।
