बेलायत भ्रमणमा रहेको भारतीय क्रिकेट टोली तेस्रो टेष्टमा जित नजिक पुगेको छ।
५२१ रनको लक्ष्य लिएर जवाफी ब्याटिङ थालेको घरेलु टोलीले मंगलबार राति चौथौ दिनको खेल सकिँदा ९ विकेटको गुमाएर दोस्रो पारीमा ३११ रन बनाएको छ। पहिलो पारीमा इंग्ल्याण्डले मात्रै १६१ रन बनाएको थियो। अझै जितका लागि इंल्याण्डलाई २१० रन आवश्यक पर्छ भने भारतीय टोलीले इंग्ल्याण्डको एक विकेट लिएमा जित आफ्नो पक्षमा पार्नेछ।
पहिलो पारीमा खराब प्रदर्शन गरेको इंग्ल्याण्डले दोस्रो पारीमा केही सुधारिएको प्रदर्शन गरेको छ। तर भारतको बिशाल योगफल पुर्याउन उसलाई समस्या देखिएको छ।
दोस्रो पारीमा इंग्ल्याण्डका जोस बट्लरले सतकीय इनिङ्स खेले। उनले २१ चौकाको सहयोगमा १०६ र बनाएका थिए भने बेन स्टोक्सले ६२ तथा स्टुअर्ट ब्रोडले २० रन बनाएका थिए।
भारतका लागि चोट मुक्त हुदै मैदान फर्किएका जसप्रीत बुमराहले उत्कृष्ट प्रर्दशन गर्दै पाँच विकेट लिँदा इशान्त शर्माले दुई विकेट लिए।
३० रन बनाएर इंग्ल्याण्डका अदिल राशिद र ८ रन बनाएर जामेस एन्डर्सन क्रिजमा छन् ।
यसअघि पहिलो पारीमा ३२९ रन बनाएको भारतीय टोलीले दोस्रो पारीमा ७ विकेटमा ३५२ दुई रनमा पारी समाप्तीको घोषणा गरेको थियो।
भारतका लागि दोस्रो पारीमा कप्तान विराट कोहलीले शतकीय पारी खेलेका थिए। यस्तै चेतेश्वर पुजाराले ७२, हार्दिक पाण्डेयले नटआउट ५२, शिखर धवनले ४४ तथा केएल राहुलले ३६ रन बनाएका थिए, अजिन्क्या राहानेले २९ रन बनाएर आउट भएका थिए। इंग्ल्याण्डका आदिल रशिदले तीन विकेट लिएका थिए। पहिलो पारीमा भारतीय कप्तान कोहलीले ९७ तथा अजिन्क्या राहानेले ८१ रन बनाउँदै स्कोर बलियो बनाएका थिए।
लगातार दुई हारसहित भारत पाँच टेस्टको शृङ्खलामा २–० ले पछि छ।
पहिलो टेस्टमा ३१ रनले हारेको भारत दोस्रो टेस्टमा एक पारी र १५९ ले पराजित भएको थियो।
