बेलायत भ्रमणमा रहेको भारतीय टोली तेस्रो टेस्टमा बलियो लयमा देखिएको छ।
तेस्रो टेष्टको दोस्रो दिनको खेल सकिँदा आइतबार भारतले घरेलु टोली इंग्ल्याण्डमाथि २९२ रनको अग्रता लिएको छ ।
पहिलो पारीमा भारत ३२९ रनमा आउट भएपछि आफ्नो पहिलो पारीको ब्याटिङ गरेको इंग्ल्याण्डले राम्रो प्रदर्शन गर्न सकेन।
घरेलु टोलीले पहिलो पारीमा १६१ रन बनाउँदै सबै विकेट गुमायो। उसका लागि जोस बट्लरले ३९, एलिस्टर कुकले २९ तथा किटन जेनिग्सले २० रन बनाउनु बाहेक अरुले खासै राम्रो प्रदर्शन गर्न सकेका थिएनन्।
इंग्लिस पारी ध्वस्त पार्ने क्रममा भारतका हार्दिक पाण्ड्याले पाँच विकेट लिएका थिए।
यस्तै जसप्रित बुमराह र इशान्त सर्माले समान दुई दुई विकेट लिए भने मोहम्मद सामीले एक विकेट हात पारे।
इंग्लिस टोलीलाई सस्तैमा समेटेको भारतले आइतबारै आफ्नो दोस्रो पारीको ब्याटिङ थालेको छ। यसमा भारतले दुई विकेट गुमाउँदै १२४ रन बनाएर खेलिरहेको छ।
दोस्रो पारीमा भारतका शिखर धवनले ४४ तथा केएल राहुलले ३६ रन बनाएर आउट भए भने ३३ रन बनाएका चेतेश्वर पुजारा र ८ रन बनाएका कप्तान विराट कोहली क्रिजमा छन्।
इंल्याण्डका आदिल रासिद र स्ट्रोकले १-१ विकेट लिए।
यसअघि लगातार दुई खेलमा हार व्यहोरेको भारतीय टोली पाँच टेष्टको शृंखलामा २–० ले पछि छ।
पहिलो टेस्टमा ३१ रनले हारेको भारत दोस्रो टेस्टमा एक पारी र १५९ रनको फरकिलो अन्तरले पराजित भएको थियो।
