भारतका पूर्व क्रिकेट कप्तान तथा टेस्ट क्रिकेटर र प्रशिक्षक अजीत वाडेकरको निधन भएको छ।
लामो समयदेखि बिरामी रहेका वाडेकरको बुधबार बेलुका ७७ वर्षको उमेरमा मुम्बईस्थित जसलोक अस्पतालमा उपचारको क्रममा उनको निधन भएको हो।
सन् १९६६ मा वेष्ट इन्डिज विरुद्ध आफ्नो पहिलो अन्तर्राष्ट्रिय क्रिकेट खेलेका वाडेकरले कुल ३७ टेस्ट क्रिकेटमा २००० भन्दा धेरै रन बनाएका थिए।
भारतीय टिमले इंग्ल्याण्डलाई उसकै मैदानमा पहिलोपटक सन् १९७१ मा हराएको बेला वाडेकर टिमका कप्तान थिए।
वाडेकरको निधनमा भारतीय क्रिकेट टिमका वर्तमान प्रशिक्षक तथा पूर्व क्रिकेटर रवि शास्त्रीले शोक व्यक्त गरेका छन्।
वाडेकरको निधन भारतीय क्रिकेटका लागि दुःखद रहेको उनले बताएका छन्।
यस्तै प्रधानमन्त्री नरेन्द्र मोदीले पनि वाडेकरको निधनमा शोक व्यक्त गरेका छन्।
‘अजित वाडेकरलाई भारतीय क्रिकेटमा उनको ठूलो योगदानका लागि याद गर्ने गरिन्छ। उनी एक महान ब्याट्मेन र राम्रा कप्तान थिए। उनको नेतृत्वमा हाम्रो टिमले जुन प्रतियोगिता जित्यो। त्यो क्रिकेट इतिहासमा सबैभन्दा बढी यादगार जित हो। उनले एक प्रभावशाली क्रिकेट प्रशासकका रूपमा पनि सम्मान कमाएका छन्। उनको मृत्युमा दुखित् छु,’ प्रधानमन्त्री मोदीले भनेका छन्।