पाकिस्तानी अलराउण्डर फखर जमानले एकदिवसीय क्रिकेटमा पहिलो दोहोरो शतक प्रहार गरेपछि पाकिस्तानले एकदिवसीय क्रिकेटमा जिम्बाम्बेबिरूद्ध फराकिलो जित निकालेको छ।
शुक्रबार भएको चौथो एक दिवसीय खेलमा जमानको कीर्तिमानी दोहोरो सतकसँगै पाकिस्तानले घरेलु टोलीलाई २२४ रनको फराकिलो अन्तरले हराएको हो।
बुलावायोमा पहिले ब्याटिङ गरेको पाकिस्तानले जमानको अविजित २१० रनसँगै निर्धारित ५० ओभरमा १ विकेट गुमाएर ३९९ रनको उच्च योगफल तयार गरेको थियो।
जमानले १५६ बलमा २१० रन बनाएका थिए। उनले ५ छक्का र २४ चौका प्रहार गरेका थिए।
योसँगै जमान एकदिवसीय क्रिकेटमा दोहोरो शतक प्रहार गर्ने विश्वका आठौं क्रिकेटर बनेका छन्।
यसअघि भारतीय क्रिकेटर रोहित शर्मा, सचिन तेन्दुलकर, विरेन्द्र सेहवाग, बेष्ट इन्डिजका क्रिस गेल र न्युजिल्याण्डका मार्टिन गुप्टिलले दोहोरो शतक प्रहार गरिसकेका छन् ।
पाकिस्तानको जितमा जमानले अर्का ओपनर इमाम उल हकसँग एकदिवसीय क्रिकेटमा कीर्तिमानी साझेदारीसमेत गरे। उनीहरुले पहिलो विकेटका लागि ३०४ रनको साझेदारी गर्दै सर्वाधिक रनको साझेदारी गरेका छन्।
उनीहरूले श्रीलंकाका उपल थरंगा र सनथ जयशूर्याको नाममा रहेको २८६ रनको कीर्तिमानसमेत तोडेका छन्।
उल हक ११३ रन बनाएर आउट भएका थिए। उनले १२२ बलमा ८ चौका प्रहार गरेका थिए। यस्तै पाकिस्तानका लागि आसिफ अलीले अविजित ५० रन जोडे।
टस हारेर पाकिस्तानले दिएको ४०० रनको फराकिलो लक्ष्य पछ्याएको जिम्बाम्बे ४२.४ ओभरमा अलआउट हुँदै १५५ रनमा समेटियो।
जिम्बावेका लागि डोनाल्ड तिरीपानोले ४४ तथा इल्टन चिगुमबाराले ३७ रन जोडेका थिए। त्यस्तै कप्तान कप्तान ह्यामिल्टन मुसाकाज्दाले २२ रन जोड्दा पिटर मुरले २० रन जोडे। जिम्बाम्बेका ६ जना खेलाडीले दोहोरो रनको स्कोर छुन सकेनन्।
जिम्बावेको पारी ध्वस्त बनाउने क्रममा पाकिस्तानका शादब खानले ४ विकेट लिए। यस्तै फाहिम आश्रफ र उस्मान खानले समान २-२ विकेट लिए भने जुनाइड खान र सोहेब मलिकले १-१ विकेट लिए।
यसअघिनै शृंखना आफ्नो नाममा पारिसकेको पाकिस्तानले घरेलु टोली जिम्बावेविरुद्धको पाँच खेलको एकदिवसीय क्रिकेट सिरिजमा ४-० को अग्रता बनाएको छ।
सिरिजको अन्तिम खेल आइतबार हुनेछ।
