इङ्ल्याण्डले दोस्रो एकदिवसीय क्रिकेटमा भारतलाई ८६ रनले हराएको छ। शनिबार राति भएको खेलमा घरेलु टोली इङ्ल्याण्डले भारतलाई हराउँदै शृंखला बराबरीमा ल्याएको हो।
लण्डनमा पहिले ब्याटिङ गर्दै इंल्याण्डले दिएको ३२३ रनको उच्च लक्ष्यसहित जवाफी ब्याटिङ गरेको भारतले पुरै ५० ओभरमा अलआउट हुँदै २३६ रन मात्र बनाउन सक्यो। उसका लागि सुरेश रैनाले ४६ तथा कप्तान बिराट कोहलीले ४५ रन बनाएका थिए।
त्यस्तै महेन्द्र सिंह धोनीले ३७ रन जोड्दा शिखर धवनले ३६ रनमा आउट भए। हार्दिक पाण्ड्याले २१ तथा ओपनर रोहित शर्माले १५ रन मात्र जोडे।
इङ्ल्याण्डका लियाम प्लुन्केटले ४ विकेट लिँदा डेभिड विलि र आदील रशिदले समान २ – २ विकेट लिए।
यसअघि टस जितेर पहिले ब्याटिङ गरेको इङ्ल्याण्डले पुरै ५० ओभर खेल्दै ७ विकेट गुमाएर ३२२ रन जोडेको थियो। इङ्ल्याण्डको लागि जोय रूटले ११३ रनको शतकीय पारी खेले । ११६ बल खेलेका उनले ८ चौका र १ छक्का प्रहार गरे।
यस्तै कप्तान इयान मोर्गनले ५३ रनको अर्धशतकीय पारी खेल्दा डेभिड विलिले अविजित ५० रन जोड्दै टिमलाई उच्च योगफलतिर डोहोर्याए।
भारतका लागि कुलदिप यादबले ३ विकेट लिए भने यजुवेन्द्र चहल, उमेश यादव र हार्दिक पाण्ड्याले १-१ विकेट लिए।
यो जितसँगै इङ्ल्याण्डले भारतविरुद्धको तीन खेलको एकदिवसीय सिरिजमा १–१ को बराबरी गरेको छ।
यसअघि पहिलो खेलमा इङ्ल्याण्डलाई भारतले ८ विकेटले हराएको थियो। दुई टोलीबीच अन्तिम तथा निर्णायक एकदिवसीय सोमबार हुनेछ।
