नेपालले एक दिवसीय अन्तर्राष्ट्रिय क्रिकेटको पहिलो शृङ्खला नेदरल्याण्ड्ससँग खेल्ने भएको छ।
एक दिवसीय अन्तर्राष्ट्रिय मान्यता पाएको नेपालले नेदरल्यान्ड्ससँग उसैको मैदानमा पहिलो एक दिवसीय क्रिकेट खेल्ने तय भएको हो ।
इङ्ल्यान्डको लर्ड्स क्रिकेट मैदानमा जुलाई २९ मा नेपाल, नेदरल्यान्ड्स र मेरिलेबोन क्रिकेट क्लब (एमसीसी) बीच एकदिने ट्वेन्टी ट्वेन्टी त्रिकोणात्मक शृङ्खला शृङ्खलापछि नेपालले नेदरल्यान्ड्स गएर दुई वटा एक दिवसीय खेल खेल्न लागेको हो।
नेपालले साउन १६ र १८ मा नेदरल्यान्ड्ससँग दुई खेल खेल्ने तय भएको नेदरल्याण्ड क्रिकेट बोर्डले पुष्टी परेको छ।
केही महिनाअघि जिम्माम्बेमा सम्पन्न विश्वकप छनोट प्रतियोगिताबाट चार वर्षका लागि एक दिवसीय क्रिकेट खेल्ने हैसियत बनाउन सफल भएको थियो।
तर अन्तर्राष्ट्रिय क्रिकेट परिषद् (आइसीसी)ले नेपालको क्रिकेट संघमाथि निलम्बन लगाएको अवस्थामा नेपाली टोलीले कहिले र कोविरुद्ध एक दिवसीय क्रिकेट खेल्छ भन्ने अन्योल थियो।
यसैबीच नेदरल्यान्ड्स क्रिकेट बोर्डले नेदरल्याण्ड भ्रमणको तय गरेको हो। नेदरल्याण्ड विरुद्धको एक दिवसीय खेल नेपालको डेब्यू हुनेछ।
दुई खेलहरू भोर्गबर्ग सिसि र भिआरए मैदानमा हुने भएको छ।
यो नेपालले एक दिवसीय मान्यता पाएपछिको पहिलो एक दिवसीय प्रतियोगिता हुनेछ। यस्तै नेदरल्याण्डका लागि पनि सन् २०१४ पछिको पहिलो एक दिवसीय प्रतियोगिता हो।
नेदरल्याण्डले त्यसयता एक दिवसीय मान्यता गुमाएको थियो। तर सन् २०१५ मा विश्व क्रिकेट लिग च्याम्पियनसिपको उपाधि जितेसँगै एक दिवीसिय मान्यता पुनः पाएको हो।
‘यो नेपाल र नेदरल्याण्डका लागि अत्यान्तै महत्वपूर्ण प्रतियोगिता हुनेछ,’ नेदरल्याण्डका कोच रायन काम्पबेलले भने, ‘हाम्रा लागि सन् २०१४ मा स्टाटस गुमाएपछिको पहिलो खेल हो भने नेपालका लागि ऐतिहिसिक प्रतियोगिता हुनेछ।’
यसैबीच युरोप भ्रमणमा हुने नेपाली टोलीले अर्को पनि एक दिवसीय सिरिज खेल्ने सम्भावना रहेको छ। क्रिकेट सम्बन्धी समाचार साइट क्रिक इन्फोका अनुसार स्कटल्याण्डसँग पनि नेपालले वान डे सिरिज खेल्नेबारे कुरा भइरहेको छ।
