अस्ट्रेलियाविरुद्ध इङ्ल्याण्डले कीर्तिमानी जित निकालेको छ। एकदिवसीय क्रिकेट सर्वाधिक उच्च योगफल बनाएको इंग्ल्याण्डले तेस्रो एकदिवसीय क्रिकेटमा २ सय ४२ रनको फराकिलो जित हात पारेको हो।
यो जितसँगै पाँच खेलको शृङ्खलामा इङ्ल्याण्ड ३–० ले आफ्नो पक्षमा पारेको छ।
मंगलबार नटिङहममा पहिले ब्याटिङ गर्दै निर्धारित ५० ओभरको खेलमा ६ विकेट गुमाएर ४८१ रन बनाएको थियो।
४८२ रनको बिशाल लक्ष्य पछ्याएको अष्ट्रेलिया ३७ ओभरमा २ सय ३९ रनमा समेटियो।
अस्ट्रेलियालाई सस्तैमा रोक्न अदिल रसिदले ४ तथा मोइन अलीले ३ विकेट लिए।
अष्ट्रेलियाका ट्राभिस हेडले ५१ रनको योगदान दिए पनि फराकिलो हार टार्न सकेनन्।
यसअघि टस हारेर वान डे क्रिकेटमै सर्वाधिक कीर्तिमान रन बनाएको घरेलु टोलीका लागि एलेक्स हेल्स र जोन्नी बैरस्टेले सतकीय पारी खेले।
एलेक्सले ९२ बलमा १४७ रन बनाउने क्रममा ४ छक्का र १६ चौका प्रहार गरे। त्यसैगरी, जोन्नी बैरस्टेले समान बलमा १ सय ३९ रनको पारी खेले। जोन्नीले ५ छक्का र १५ चौका प्रहार गरेका थिए। यी दुईले दोस्रो विकेटका लागि १ सय ५१ रनको साझेदारी गरेका थिए।
यसअघि पनि उत्कृष्ट सुरूआत गरेको इंग्ल्याण्डका लागि पहिलो विकेटमा जेसन रोय र जोन्नीबिच १ सय ५९ रनको साझेदारी गरेका थिए।
यस्तै कप्तान इयान मोर्गेनले सबैभन्दा छिटो अर्धशतक प्रहार गर्दै ३० बल खेलेर ६७ रन बनाए। २१ बलमा अर्धशतक उनी सबैभन्दा छिटो हाफ सेन्चुरी बनाउने इङ्लिस खेलाडीसमेत बने।
अष्ट्रेलियाका लागि जेह रिचर्डसनले ३ विकेट लिएका थिए।
इंग्ल्याण्डले जारी एकदिवसीय खेलको सिरीज अन्तर्गत अस्ट्रेलियालाई पहिलो एकदिवसीय खेलमा ३ विकेट र दोस्रो खेलमा ३८ रनले हराएको थियो। दुवै टोलीबीच चौथो खेल बिहीबार हुनेछ।
योसँगै दुई वर्षअघि पाकिस्तानविरुद्ध आफैले बनाएको ४४४ रनको कीर्तिमानसमेत तोडेको छ।