प्रधानमन्त्री केपी शर्मा ओलीले सम्पूर्ण मन्त्रालय र विभागहरुलाई तथ्यांकसहित वृहत योजना बनाउन निर्देशन दिएका छन्। देशको आवश्यकतालाई बुझेर तथ्यसहित विस्तृत कार्ययोजना बनाएर पेश गर्न प्रधानमन्त्री ओलीले निर्देशन दिएका छन्।
सोमबार राष्ट्रिय विकास समस्या समाधान समितिको ४२ औं बैठकलाई सम्बोधन गर्दै प्रधानमन्त्री ओलीले सो कुरा बताएका हुन्।
समितिका अध्यक्ष सकेत रहेका प्रधानमन्त्री ओलीले साविक जस्ता झिनामसिना होइन राष्ट्रिय महत्वका बहुसंख्यक जनता लावान्दित हुने योजना बनाउन,त्यसलाई कार्यन्वयन गर्ने कार्य योजना र सम्पन्न हुने समय समयसिमा पनि तोकेर राष्ट्रिय योजना आयोगमा पेश गर्न सबै मन्त्रीहरुलाई निर्देशन दिएका छन्।
‘कृषिलाई आधुनिकिकरण गर्न के के आवश्यक छ? के कति लगानी आवश्यक छ? कृषिमा आश्रित कति जनसंख्या छ? उत्पादन उत्पादकत्व वृद्धि गर्न के गर्नुपर्दछ?’, प्रधानमन्त्री ओलीले भने ‘यी सबै कुरा तथ्य सहित पेश गर्नुहोस्।’
प्रधानमन्त्री ओलीले विगतको सरकारले बन्द गरेका उद्योग वर्तमान सरकारले सञ्चालन गर्ने बताएका छन्। ‘कति वटा उद्योग छन्? के कति उद्योग बन्द छन्? कतिलाई तत्काल सञ्चालन गर्न सकिन्छ? यी सब योजना बनाएर कार्यन्वयन थाल्नुपर्छ’, प्रधानमन्त्री ओलीले भने।
प्रधानमन्त्री ओलीले सरकारले देशलाई विकासकोे नयाँ गतिमा लैजान खोजेको बताए। ‘अब सबै कामलाई विगतको निरन्तरता होइन’, प्रधानमन्त्री ओलीले भने, ‘हरेक कामलाई नयाँ ढंगले वृहत सोचाइका साथ अघि बढाउनु पर्छ।’
प्रधानमन्त्री ओलीले सानातिना योजना मन्त्रालय तहबाटै टुंग्याउन र ठूला योजनाहरु राष्ट्रिय योजना आयोग र राष्ट्रिय विकास समस्या समाधान समितिमा पेश गर्न मन्त्रीहरुलाई निर्देशन दिएका छन्।‘दुई चपरी माटो कोदालोले नै फाल्नुहोस्’ प्रधानमन्त्री ओलीले भने ‘डोजरै चलाउनु परे यहाँ ल्याउनुहोस्।’
प्रधानमन्त्री ओलीले देशलाई आत्मनिर्भर बनाउने तर्फ सबैले ध्यान दिनु पर्ने बताएका छन्। वृक्षारोपण गर्दा फलफूलका विरुवा रोप्न आग्रह गरेका छन्। फलफूलका विरुवा रोप्दा रुख पनि भयो फल पनि भयो। प्रधानमन्त्री ओलीले भने, ‘फलफूल लगाएमा फल जति किसानको रुख जति सरकारको हुन्छ। त्यसो हुँदा दुवै पक्षलाई फाइदा हुन्छ।’
प्रधानमन्त्री ओलीले मानव स्वास्थ्यमा गम्भीर असर गर्ने वश्तुको आयातलाई तत्काल रोकिने बताए। सीमाका क्वारेन्टाइन कार्यालयहरुलाई चुस्त बनाएर विदेशबाट आयात हुने वश्तुको राम्ररी परीक्षण गरेर खान योग्य भए मात्र स्वदेश भित्र्याउने अनुमति दिनुपर्ने प्रधानमन्त्री ओलीको भनाइ छ।
सरकारले लक्ष्य राखेको समृद्ध र विकास हासिल गर्नका लागि ‘मोडालिटी,भिजन र एट्टिट्यूड’मा परिवर्तन गर्नै पर्नेमा प्रधानमन्त्री ओलीको जोड छ।
सरकारको नीति तथा कार्यक्रमले देश विकासको लक्ष्य निर्दिष्ट गरेकोले त्यसलाई कार्यन्वयन गरेर विकास र समृद्धि हासिल गरिने प्रधानमन्त्री ओलीको भनाइ छ। प्रधानमन्त्री ओलीले राष्ट्रिय योजना आयोगलाई पनि वृहत्तर योजना बनाएर समितिको बैठकमा पेश गर्न आग्रह गरे। ‘अब चल्ते चलाते होइन’ प्रधानमन्त्री ओलीले भने, ‘सांच्चै देश विकास गर्नुछ। त्यसले गर्दा सबैले फरक ढंगले सोचौं। फरक ढंगले काम गरौं।’
बैठकमा राष्ट्रिय योजना आयोगका उपाधक्ष्य डा.पुष्प कँडेलले आर्थिक बर्ष २०७४/०७५ को दोस्रो चौमासिक बजेट खर्च र आयोजनाहरुको प्रगति विवरण पेश गरिएको थियो। बैठकमा मन्त्रीहरुले आफ्नो मन्त्रालयसँग सम्बन्धित विभिन्न योजनाहरु र तिनको सञ्चालनमा आएका कठिनाइको बिषयमा आफ्ना धारणा राखेका थिए।
