नेपालले एसिसि यु १६ पूर्वी क्षेत्रीय क्रिकेट प्रतियोगितामा म्यानमारलाई ३ सय ३३७ रनले हराएको छ।
यसअघि नै प्रतियोगिताको सेमिफाइनल पुगिसकेको नेपाल समूहको अन्तिम खेलमा कमजोर प्रतिद्वन्द्वी म्यानमारमाथि नेपालले सहज जित हात पार्दै समूह विजेता भएको हो।
४ टीम रहेको समूहमा म्यानमारले अहिलेसम्म एउटा पनि खेल नजिति घर फर्किएको छ।
नेपालले दिएको बिशाल ३५१ रनको लक्ष्य पछ्याएको म्यानमार ११.३ ओभर खेल्दै मात्र १३ रनमा समेटिएको थियो। म्यानमारको इनिङ ध्वस्त गर्ने क्रममा नेपालका नारायण जोशी र मेघबहादुरसेन थापाले कसिलो बलिङ गरे। जोशीले एकै ओभरमा ४ विकेट लिए भने थापाले एक ओभरमा दुई तथा अर्को ओभरमा दुई विकेट लिए। विशाल विक्रम केशीले थप २ विकेट लिए।
म्यानमारका ७ खेलाडी शून्य रनमा आउट भएका थिए।
यसअघि टस जितेर पहिले ब्याटिङ गरेको नेपालले निर्धारित ३५ ओभरको खेलमा ६ विकेट गुमाएर ३ सय ५० रन बनाएको हो।
नेपालका लागि कप्तान रित गौतमले नटआउट १ सय ६ र प्रतिश जिसिले नटआउट ६३ रन बनाए। यस्तै तृतराज दाशले ६४ रनको योगदान गरेका थिए।
थाइल्याण्डको टेर्डथाइ क्रिकेट मैदानमा पहिलो विकेटका लागि ५४ रनको साझेदारी गरेको नेपालका लागि कुशल मल्लले ३६ रन बनाए। त्यसपछि सुवास ऐयर १७ रनमा पेभेलियन फर्किएपछि नेपालले ६७ रनमा दोस्रो विकेट गुमायो। तेस्रो विकेटका लागि विशाल विक्रम केसी र रित गौतमले ६९ रनको साझेदारी गर्दै नेपाललाई बलियो स्थितिमा पुर्याए।
तर विशाल ४२ रनमा आउट भएपछि नेपालले तेस्रो विकेट गुमायो । त्यसपछि चौथो विकेटका लागि त्रितराज दाश र रितले ९९ रनको साझेदारी गर्दै नेपालको स्कोर बलियो स्थितिमा पुर्याए।
त्रितराजले ६४ रन बनाउदा रित गौतमले सतकिए पारी खेले। यस्तै प्रतिश जिसीले अविजीत ६३ रन बनाए।