नेपाल र युएई भिड्दै, खेल युट्युबबाट प्रत्यक्ष प्रसारण हुने


विश्व क्रिकेट लिग (डब्लुसिएल) च्याम्पियनसिप अन्तर्गत पहिलो खेलमा नेपालले आज युएईसँग प्रतिस्पर्धा गर्दैछ। आबुधावीको शेख जायेद रंगशालामा नेपाली समयअनुसार खेल आज सवा ११ बजेदेखि सुरू हुनेछ।

झन्डै साढे ३ वर्षपछि नेपाल र युएईबीच एकदिवसीय खेलमा प्रतिस्पर्धा हुन लागेको हो। पछिल्लो पटक नेपाल र युएईबीच मे २०१४ मा एसिसि प्रिमियर लिगमा प्रतिस्पर्धा गरेका थिए। उक्त खेलमा नेपालले युएईलाई ४ विकेटले हराएको थियो। त्यसपछि जनवरी २०१४ मा भएको आइसिसी विश्वकप छनोटको खेलमा युएईले नेपाललाई १ सय २ रनको फराकिलो अन्तरले हराएको थियो।

डब्लुसिएलको अन्तिम चारमा पर्न नसकेर नेपाल र युएई दुवै डिभिजन–२ मा झरिसकेका छन्। अन्तिम चरणलाई दुवै टिमले डिभिजन–२ को तयारीका रुपमा लिएका छन्।

नेपालले युएईसँग प्रतिस्पर्धा गर्नुअघि दुई अभ्यास खेल खेलेको थियो। अमेरिकासँगको पहिलो अभ्यास खेलमा ५ विकेटले पराजित नेपालले दोस्रो अभ्यास खेलमा केन्यालाई ६ विकेटले हराएको थियो।

करिब एक महिनाको प्रशिक्षण पछि युएई पुगेको नेपाली टिमको यो लिगको अन्त्य सुखद गर्ने लक्ष्यमा रहेको छ। नेपाली कप्तान पारस खड्काले युएई विरुद्धको खेललाई डिभिजन–२ को तयारीका रुपमा लिएको बताएका छन्। उनले युएईसँगको खेललाई डिभिजन–२ को तयारीका रुपमा लिएको भन्दै नेपाली टिम राम्रो बाटोमा रहेको तथा नेपालको पक्षमा नजिता बिस्तारै आउने समेत बताएका छन्।

http://www.espn.com/video/clip?id=21671410&t=00m00s

नेपालले लिगमा भएका १२ खेल मध्ये चारमा जित निकालेको थियो भने सात खेल हारेको थियो। यस्तै तीन खेल मात्रै जितेको युएईले नौ खेल हारेको थियो।

डिभिजन–२ प्रतियोगिता आगामी फेब्रुअरीमा नामिबियामा हुनेछ। डिभिजन–२ मा ६ टिमबीच प्रतिस्पर्धा हुनेछ। डिभिजन–२ मा नेपाल, युएई, नामिबिया, क्यानडा र ओमानले खेल्ने पक्का भइसकेको छ। डब्लुसिएल च्याम्पियनसिपको शीर्ष चारभित्र पर्ने दौडमा रहेका स्कटल्यान्ड, हङकङ र केन्यामध्ये १ टिम डिभिजन–२ मा झर्नेछन्।

यसैबीच युएई विरुद्ध आज हुने नेपालको खेल खेलको यु ट्यूवबाट प्रत्यक्ष प्रशारणसमेत हुने भएको छ ।

आईसीसीका अनुसार नेपाल र युएईको खेल, आफ्नो आधिकारिक वेवसाईट www.icc-cricket.com र आइसीसीको youtube बाट LIVE गर्ने भएको छ ।

नेपालले विश्व क्रिकेट लिग च्याम्पियनसीपको सातौ चरण अन्तर्गत दोस्रो खेल मंसिर २२ गते खेल्नेछ।

१४ सदस्यीय नेपाली टोली

पारस खड्का (कप्तान), ज्ञानेन्द्र मल्ल, बसन्त रेग्मी ,शरद भेषवाकर, शक्ति गौचन, सागर पुन, सोमपाल कामी, सन्दिप लामिछाने, विनोद भण्डारी, करण केसी, ललितसिंह भण्डारी, मोहम्मद आरिफ शेख, दीपेन्द्रसिंह ऐरी र दिलीप नाथ।

वैकल्पिक खेलाडी– सिद्धान्त लोहनी, जितेन्द्र मुखिया, कुशल भुर्तेल र अनिलकुमार साह

Share:

© 2017 Setopati Sanchar Pvt. Ltd.