नेपालले आइसिसी महिला विश्व टी–२० एसिया छनोट प्रतियोगितामा थाइल्याण्डले दिएको ९१ रनको लक्ष्य पछ्याइरहेको छ।
टस जितेर नेपालले पहिले घरेलु टोलीलाई ब्याटिङको निम्तो दिएको छ। निर्धारित २० ओभरमा थाइल्याण्डले ६ विकेट गुमाएर ९० रन बनायो। उसका लागि एन चाइवाईले सर्वाधिक २३ रन बनाइन्। एन चान्तामले १८ रन बनाउँदा तिप्पोचले १५ र सुतिरूहाङले नटआउट १३ रन बनाइन्। बाँकी दोहोरो रनको स्कोर बनाउन सकेनन्। नेपालका लागि सरिता मगरले २ विकेट लिइन्।
थाइल्यान्डको टेडथाई क्रिकेट मैदानमा नेपालले जवाफी ब्याटिङ थालेको छ।
एक महिनाको छोटो तयारीमा बैंकक पुगेको नेपालले छनोट हुने लक्ष्य बनाएको छ।
अघिल्लो वर्ष थाइल्याण्डविरूद्ध खराब प्रदर्शन गरेको नेपाली टिमका लागि आज थाइल्यान्डले बलियो चुनौती दिने भएको छ। गत वर्ष नेपालले थाइल्यान्डसँग खेलेका तीनै खेलमा पराजय बेहोरेको थियो।
एक साता बंगलादेश तयारीपछि नेपाली टिम थाइल्यान्ड पुगेको छ। तयारीका क्रममा नेपाल खेलेका ४ मध्ये २ अभ्यास खेल जितेको थियो। पहिलो २ खेल जितेको नेपाल अन्तिम २ खेलमा पराजित भयो।