यसरी सम्भव भयो भारतमाथि नेपालको रवाफिलो जित

सेतोपाटी संवाददाता

काठमाडौं, कात्तिक २६

मलेसियामा जारी एसिसी यू–१९ एसिया कप क्रिकेटमा नेपालले भारतविरूद्ध ऐतिहासिक जित हात पारेको छ। कप्तान दीपेन्द्र सिंह ऐरीको सानदार प्रदर्शनसँगै नेपालले भारतलाई १९ रनले हराउँदैं इतिहास रच्न सफल भएको हो। ८८ रन बनाएर भारतको चार विकेट लिएका कप्तान ऐरी खेलको ‘म्यान अफ दी म्याच’समेत भए।

मलेसियाको वायुमास ओभलमा टस जितेको भारतले बलिङ गर्ने निर्णय गरेपछि पहिले ब्याटिङ गरेको नेपालले निर्धारित ५० ओभरको खेलमा ८ विकेट गुमाउँदै १ सय ८५ रन बनाएको थियो।

नेपालका लागि कप्तान ऐरीले सर्वाधिक ८८ रन जोडे। उनले १०१ बलको सामना गर्दै ६ चौका र २ छक्का हिर्काए। त्यस्तै ओपनर ब्याट्स्म्यान जितेन्द्र सिंहले ३६ रनको योगदान गरे। उनले ९५ बलमा ३ चौका प्रहार गरे। अर्का ओपनर आसिफ शेखले ३ रन मात्र जोड्न सके।

अनिलकुमार साह ६ रनमा आउट हुँदा रोहितकुमार पौडेल पनि ६ रनमै पेभेलियन फर्किए। यसपछि आएका भीम सार्कीले १५ रनको योगदान गरे। उनले २२ बलमा २ चौका र १ छक्का हिर्काए। पवन सर्राफ १ रनमै पेभेलियन फर्किए। कमलसिंह ऐरी १७ बलमा ५ रन जोडेर आउट भए भने सन्दीप लामिछानेले नटआउट ९ र किशोर महतोले नटआउट ७ रन जोडे।

बलिङतर्फ भारतका आदित्य ठाक्रे र अभिषेक शर्माले २–२ विकेट लिए। मन्दिप सिंह, विवेकानन्द तिवारी, शिव सिंह र अथर्व टइडेले १–१ विकेट हात पारे।

नेपालले दिएको १८६ मध्यम लक्ष्य पछ्याएको भारतले ४८.१ ओभरमा सबै विकेट गुमाएर १ सय ६६ रन मात्र बनाउन सक्यो। उसका लागि ओपनर तथा कप्तान हिमांशु रानाले ४६ रन जोडे। ३८ बलमा ७ चौका र १ छक्का प्रहार गरेका उनलाई नेपालका कमलसिंह ऐरीले बोल्ड आउट गरेका थिए।

कप्तान दीपेन्द्रसिंह ऐरीले आदित्य ठाक्रेलाई १३ रन बनाएर खेलिरहँदा एलबिडब्लूको धरापमा पारे। मनोज कर्ला ३५ र सलमान खान १ रनमा आउट भए। मनोजलाई पवन सर्राफ र सलमानलाई साहब अलामले आउट गरे। अनुज रावलले २६ बलमा १८ रन जोडे। यसपछि आएका तनुस कोइटेनलाई शून्य रन पेभिलियन फर्काउन नेपाल सफल भयो।

अभिषेक शर्मा २७ रन बनाएर खेलिरहँदा आउट भएपछि खेल नेपालको पक्षमा आएको थियो। लगत्तै कप्तान दीपेन्द्रसिंह ऐरीले मन्दीप सिंहलाई शून्य रनमा आउट गरे। ऐरीले नै शिव सिंहलाई ९ रनमा आउट गरे। यसरी कठीन परिस्थितिमा पनि बलिङतर्फ सशक्त प्रदर्शन गरेका कारण नै नेपालको जित सम्भव भएको हो।

यसअघि शनिबार आफ्नो पहिलो खेलमा नेपाल पराजित भएको थियो। नेपाललाई बंगालदेशले २ विकेटको झिनो अन्तरले हराएको थियो। एसिया कपअन्तर्गत भारतले पहिलो खेलमा मलेसियालाई हराएको थियो। नेपालले समूह चरणको अन्तिम खेलमा मंगलबार मलेसियासँग प्रतिस्पर्धा गर्नेछ।

अब नेपालले अघिल्लो चरणमा पुग्न मलेसियालाई जित्नैपर्ने हुन्छ। त्यती मात्र होइन भारत र बंगालदेशबीचको खेल र कूल रन–रेटले पनि यसमा प्रभाव पार्नेछ। यो जितसँगै नेपाल समूहको दोस्रो स्थानमा उक्लिएको छ। समान अंक भएपछि रनरेटका आधारमा भारत पहिलो र बंगलादेश तेस्रो स्थानमा छन्। समूहका २ टोली सेमिफाइनल प्रवेश गर्ने छन्। अब भारतले बंगलादेश र बंगलादेशले भारतसहित मलेसियासँग खेल्नेछ।

हेर्नुहोस् तस्बिरहरू- सबै तस्बिरः रमन सिवाकोटी/क्यान