सरकारले नेपाल स्काउटको वर्तमान केन्द्रीय कार्यकारी समिति विघटन गरी चन्दन कौशिकको संयोजकत्वमा १३ सदस्यीय केन्द्रीय तदर्थ समिति गठन गरेको छ ।
कौशिक यसअघि धनुषा जिल्ला स्काउटको जिल्ला आयुक्त थिए।
युवा तथा खेलकुदमन्त्री एवम् नेपाल स्काउटका प्रमुख स्काउट राजेन्द्रकुमार केसीको अध्यक्षतामा मंगलबार बसेको बैठकले नयाँ तदर्थ समिति गठन गरी ऐन र नियमावलीअनुसार नयाँ राष्ट्रिय परिषद् र केन्द्रीय कार्यकारी समिति गठन गर्ने जिम्मेवारी तोकेको छ ।
तदर्थ समितिले एक वर्षभित्र राष्ट्रिय परिषद् र केन्द्रीय कार्यकारी समितिको निर्वाचन गराउनुपर्नेछ ।
तदर्थ समितिमा झापाका शिव पौडेल, सुर्खेतका पार्वती गिरी, भक्तपुरका पुण्यराम गोथे, ललितपुरका केशव महर्जन, काठमाडौंका दीपेश केसी, जयराम कार्की र गौतम अधिकारी, सिन्धुपाल्चोकका देवदूत अधिकारी, चितवनका मनोजजङ्ग रायमाझी, प्यूठानका रामप्रसाद शर्मा, धनुषाका रामकुमार भण्डारी र कास्कीका गोमा घिमिरे पौडेल छन् ।
समितिको सल्लाहकारमा काठमाडौंका डा रवीन्द्रप्रसाद पाण्डे छन् । उनीहरूले आज नेपाल स्काउट राष्ट्रिय प्रधान कार्यालयमा पदबहाली गरेका छन् । यसअघि रवीन दाहालको नेतृत्वमा रहेको केन्द्रीय कार्यसमितिले समयमा निर्वाचन गराउन नसकेको आरोप छ । रासस
