नेपाली क्रिकेटको सर्वाधिक पुरस्कार राशीको एभरेस्ट प्रिमियर लिगको दोस्रो संस्करण आगामी डिसेम्बरमा हुने भएको छ। लिगमा उपाधि विजेता टिमले २१ लाख पुरस्कार पाउनेछन्।
यसअघि प्रधानमन्त्री कपको विजेताले २० लाख पुरस्कार पाएका थिए। आयोजक एभरेष्ट प्रिमियर लिग प्रालिले आइतबार राजधानीमा पत्रकार सम्मेलन गर्दै एभरेस्ट प्रिमियर लिगको मिति र लोगो सार्वजनिक गरेको हो।
प्रतियोगिताको फर्म्याटमा समेत परिवर्तन गरिएको खेल राउन्ड रोविन लिगका आधारमा सञ्चालन हुनेछ।
विभिन्न ६ शहरका ६ टिमको सहभागिता रहने प्रतियोगितामा काठमाडौं, विराटनगर, भैरहवा, वीरगन्ज, ललितपुर र पोखराले खेल्नेछन्।
प्रतियोगिताका लागि अक्सनबाट खेलाडी छनोट गरिनेछ भने विदेशी खेलाडी पनि राख्न पाउने प्रावधान राखिएको छ। एक टिममा १५ खेलाडी रहनेछन्।
१० खेलाडी अक्सनबाट, तीन विदेशी र एक जना ट्यालेन्ट हन्टबाट खेलाडी छनोट गरिने आयोजकले जनाएको छ। प्रत्येक टिममा तीन जना विदेशी खेलाडी अनिवार्य राख्नुपर्ने प्रावधान राखिएको छ।
घरेलु प्रतियोगिता विदेशी खेलाडी राख्न लागिएको यो पहिलो पटक हो। एक जना मार्केट प्लेयर पनि राख्न पाउने ब्यवस्था गरिएको छ। प्रतियोगिताको यकिन मिति भने पछि सार्वजनिक गरिने आयोजकले बताएको छ।
कीर्तिपुर क्रिकेट मैदानमा हुने प्रतियोगिताको फर्म्याट भारतमा हुने इन्डियन प्रिमियर लिगको जस्तै छ। हरेक टिमले लिगमा एक अर्कासँग खेलेर प्लेअफ हुँदै फाइनल पुग्नेछन्।
