एसीसी अन्डर १६ इस्टर्न रिजनल प्रतियोगिता अन्तर्गत दोस्रो खेलमा नेपालले हङकङलाई ४ विकेटले हराउँदै जित हात पारेको छ।
टेर्ड थाई मैदानमा सम्पन्न खेलमा टस जितेर ब्याटिङ गरेको हङकङले ३५ ओभर ब्याटिङ गर्दै ९ विकेट गुमाई ८२ रन बनाएको थियो।
नेपालले निर्धारित लक्ष्य २४.१ ओभरमा ६ विकेट गुमाउँदै पुरा गर्यो।
नेपालका लागि तीर्थराज दासले सर्वाधिक २७ रन बनाए। त्यस्तै राजन मगरले १७ तथा विशाल विक्रम केसी र शुशील भण्डारीले ११/११ रन बनाए। कुशल मल्ल र नारायण जोशीले २/२ रनको योगदान गरे।
हङकङलाई ८२ रनमा रोक्न नेपाली बलर प्रतिस जिसीले सर्वाधिक ३ विकेट हात पारे। यस्तै अत्यन्त किफायती बलिङ गरेका अजय कुमार लुनियाले २ विकेट लिने क्रममा कूल ७ ओभर बलिङ गर्दै ५ मेडन ओभर सहित मात्र २ रन खर्चेका थिए। नारायण जोशी र निखिल कुमार सिंहले पनि १/१ विकेट हात पारे।
नेपालले आफ्नो पहिलो खेलमा सोमबार थाइल्याण्डलाई १३३ रनले पराजित गरेको थियो। यस्तै हङकङले आफ्नो पहिलो खेलमा म्यानमारलाई पराजित गरेको थियो।
आठ टोली सहभागी प्रतियोगितामा नेपाल समुह ‘ए’ मा हङकङ, थाइल्याण्ड र म्यानमारसंगै रहेको छ। समुहमा उत्कृष्ट हुने २ टिम सेमीफाइनल पुग्नेछ। प्रतियोगिताका सबै खेलहरु ३५ ओभरको इनिङसमा खेलाइएको छ।