ताप्लेजुङमा जीप दुर्घटना: दुईको मृत्यु


पाथिभरा दर्शन गरी फर्किएका तीर्थयात्री बोकेको जीप आज दुर्घटना हुँदा दुईजनाको मृत्यु भएको छ।

मे१ज १३०८ नंको जिप फुङ्लिङ नगरपालिका–१० भालुगौडे– सुकेटार पाथीभरा सडकखण्डमा दुर्घटना हुँदा जीपमा सवार उर्लाबारी–४ की २५ वर्षीया अनिता थापा घिमिरे र ३० वर्षीय होमराज घिमिरेको मृत्यु भएको हो।

अनिताको घटनास्थलमै तथा होमराजको उपचारका क्रममा जिल्ला अस्पताल ताप्लेजुङमा मृत्यु भएको प्रहरी नायब उपरीक्षक ज्ञानेन्द्रबहादुर बस्नेतले जानकारी दिए। दुर्घटनामा परी उर्लाबारी–४ का २० वर्षीय अनिलजंग थापा, २६ वर्षीय दिलीप घिमिरे र चालक इलाम निवासी अमित श्रेष्ठ घाइते भएका छन्।

घाइतेको जिल्ला अस्पतालमा उपचार भइरहेको छ। जीप ब्रेक फेल भई सडकबाट झण्डै २०० मिटर तल खसेको थियो।

Share:

© 2017 Setopati Sanchar Pvt. Ltd.