नेपाल विधुत् प्राधिकरण धनगढी वितरण केन्द्रमा लामो समयदेखि विद्युतको महसुल नबुझाउने ३०५ ग्राहक कालोसूचीमा परेका छन् ।
लाइन काटिएको छ महिनासम्म पनि महसुल नबुझाउने ग्राहकलाई कालोसूचीमा राखिएको नेपाल विद्युत् प्राधिकरण धनगढी कार्यालयका लेखापाल गोविन्द ढकालले बताए । कालोसूचीमा पर्नेमा घर विक्री गरी अन्यत्र बसाइँसराइ गरेका, साविकको भन्दा अर्को ठाउँमा घर बनाइ बसेका र केही उद्योग छन् ।
यी ग्राहकबाट महसुलबाफत ३३ लाख रुपैयाँ रकम असुल गर्न बाँकी छ । विद्युत् महसुल नतिर्ने ग्राहकको लाइन काट्न सुरू बक्यौता रकम बुझाउन ऊर्जा मन्त्रालयले जारी गरेको १५ दिने सूचनाको समय सकिएसँगै प्राधिकरण धनगढी शाखाले महसुल नबुझाई बक्यौता राख्ने ग्राहकको लाइन काट्न थालेको हो ।
तीन दिनमा ४० भन्दा बढी ग्राहकको लाइन काटिएको छ । लाइन काटिएसँगै कतिपय ग्राहकले बक्र्यौता रकम बुझाएर पुनः लाइन जडान गर्न थालेका छन् । गत असारमा नेपाल विद्युत् प्राधिकरण धनगढीको झण्डै १२ करोड रुपैयाँ बक्यौता असुल गर्न बाँकी छ ।
बक्यौता रकम सबैभन्दा बढी सडक बत्तीको पाँच करोड ४३ लाख रुपैयाँ छ । ग्राहकतर्फ एक करोड ९२ लाख रुपैयाँ, व्यापारिक क्षेत्रतर्फ एक करोड रुपैयाँ, उद्योगतर्फ दुई करोड रुपैयाँ र सामुदायिक क्षेत्रतर्फ एक करोड रुपैयाँ बक्यौैता रहेको प्राधिकरणले जनाएको छ । रासस
