किंग्स कलेजले इन्टरनेशनल आन्टरप्रेनरसिप फोरम आयोजना गर्ने


किंग्स कलेजले आगामी भदौ २९ देखि ३१ सम्म १६औं इन्टरनेशनल आन्टरप्रेनरसिप फोरम (आइएफ) सम्मेलन आयोजना गर्ने भएको छ।

तीन दिनसम्म सञ्चालन हुने कार्यक्रम आयोजनाका लागि कलेजले बेलायतस्थित इसेक्स विजनेश स्कुलसँग सहकार्य गरेको छ।

हरेक वर्ष विश्वका विभिन्न राष्ट्रमा आयोजना हुने यस आइएफ सम्मेलनको यस वर्षको नारा ‘दिगो उधमशिलता तथा आर्थिक विकास’ रहेको छ।

सन् २००१ मा इटालिको नेपल्स्बाट सुरू सम्मेलनको आयोजना हालसम्म चीन, भारत, दक्षिण अफ्रिका, कोलम्बिया, टर्की, बहराइन, इटाली, लुथिनिया तथा लाट्भीयाले गरेका छन्।

यस वर्ष नेपालमा पहिलोपटक कार्यक्रमको आयोजना हुन लागेको हो ।

सम्मेलनअन्तर्गत प्लिनरी तथा प्यानल सेसन, शैक्षिक, नीतिगत तथा अभ्यासजन्य प्रस्तुती तथा छलफलहरु, नेटवर्किङ्ग, सामाजिक अन्तरक्रिया तथा उत्कृष्ट प्रस्तुतीहरुलाई पुरष्कार लगायतको कार्यक्रमहरु समावेश गरिने किङ्स् कलेजले जनाएको छ।

यसका अलावा, सम्मेलनमा १३ वटा स्टलहरु पनि राखिनेछ जसमा मेडेप परियोजनाअन्तर्गत छानिएका १० उत्कृष्ट बस्तुहरुको प्रदर्शनी गरिनेछ।

पाँच वटा सफल उधमशिलताको यात्रा सम्बन्धि भिडियो देखाइनेछ। उत्कृष्ट चयन हुने एक भिडियोलाई ५० हजार रुपैँया नगदद्वारा सम्मान गरिनेछ ।

आयोजक कलेजका अनुसार सम्मेलनको क्रममा राष्ट्रिय तथा अन्तर्राष्ट्रिय गरी जम्मा ६० जना प्रस्तोताहरुले दिगो उधमशिलता, स्टार्टअप तथा दिगो उधमशिलता, दिगो उधमशिलता तथा विकासका साथसाथै दिगो उधमशिलतामा महिला लगायतको सहायक थिमहरुमा आफ्नो प्रस्तुती राख्नेछन्।

कार्यक्रममा शिक्षक तथा विद्यार्थी, उद्यमी, विज्ञ, अनुसन्धानकर्ता, ब्यापारी तथा ब्यवसायी र विकास संस्थाहरुको प्रतिनीधि गरी ६०० जनाभन्दा बढी सहभागी हुने अपेक्षा गरिएको छ।

‘गएको वर्ष हामीले आयोजना गरेको सामाजिक उद्यमशिलतामा अन्तर्राष्ट्रिय सम्मेलनबाट प्रभावित भएर यस वर्ष हामीलाई आइएफ सम्मेलनको आयोजना गर्ने अवसर प्रदान गरिएको हो,’ कलेजका प्रधानाध्यापक नरोत्तम अर्यालले भने, ‘आइएफ सम्मेलनको आयोजना गर्ने अवसरलाई हामीले नेपालमा उधमशिलताको विकास तथा प्रबद्र्धनमा निरन्तररुपमा खटिएबापतको सम्मानको रुपमा लिएका छौ।’

लामो इतिहास तथा बृहत्तर प्रभाव पार्न सफल आइएफ सम्मेलनको आयोजनाले देशमा उधमशिलताको क्षेत्रमा थप बद पुग्ने विश्वस लिएको अर्यालले जनाए ।

कलेजले एमबिए अन्टरप्रेनरशिपको विशेष कक्षा संचालन गरिरहेको छ भने सामाजिक उधमशिलता केन्द्रको स्थापना, सामाजिक उधमशिलतामा वार्षिक अन्तराष्ट्रिय सम्मेलनको आयोजना, विजनेश इन्कुवेटरको संचालन लगायतद्धारा देशको उधमशिलताको क्षेत्रमा उल्लेख्य योगदान पुर्‍यायाइरहेको छ ।

सम्मेलनमा सहभागी हुन नेपाली नागरिकलाई ६६५० रुपैँया तथा न्यून आय भएका मुलुकहरुको नागरिकका लागि १३४०० रुपैँया दर्ता शूल्क तोकिएको छ। नेपाली तथा विदेशी पूर्णकालीन विद्यार्थीहका लागि सो शूल्क ५३०० रुपैँया तथा बेलायती नागरिकका लागि २६८०० तोकिएको छ।

 

Share:

© 2017 Setopati Sanchar Pvt. Ltd.