जिल्ला प्रहरी कार्यालय पाँचथरले सदरमुकाममा विभिन्न प्रलोभन देखाई नेटवर्किङ विजनेस गर्दै आएका एक जना संचालकसहित दुई जनालाई पक्राउ गरेको छ ।
प्रहरीले शुक्रबार बिहान सदरमुकामबाट आईअोस ग्लोबल मार्केटिङको नाममा विभिन्न सामग्रीहरू विक्री गर्दै आएका फिदिमका व्यवसायी दिपक धमाला सहित अर्का एक ग्राहकलाई पक्राउ गरेको हो ।
विभिन्न व्यक्तिहरूको मौखिक गुनासोका आधारमा केहि दिनबाट अनुसन्धान गरिरहेको अवस्थामा केहि सामग्रीसहित पक्राउ गरिएको प्रहरी नायब उपरीक्षक बामदेव गौतमले जानकारी दिए । पक्राउ परेका व्यक्तिहरूसहित उत्पादित सामग्रीहरूको गुणस्तर र वैधताका बारेमा अनुसन्धान भैरहेको गौतमले बताए ।
आईअोस नामक कम्पनीको नाममा उत्पादित सामग्रीहरू ‘एण्टी रेडिएशन बायोम्याग्नेटिक’ भएको भन्दै एभरेष्ट इनर्जी वाच नामको घडी लगायत व्रासलेट, चुरा, लकेट, औंठी लगायतका सामग्रीहरू १० देखि ३० प्रतिशत छूटमा समूहको सदस्य बनेर विक्री गरीरहेको बताइएको छ ।
उक्त समूहले कम्पनीका सामग्रीहरूबाट रक्तचाप, किड्नी, प्रेसर, आँखा, नशा सम्वन्धि समस्याहरूको निदान गर्ने भन्दै प्रत्यक्ष र अप्रत्यक्ष रुपमा विक्रीको आधारमा लाभ हुने भन्दै सर्वसाधारणलाई ठगी गरिरहेको मौखिक जानकारी पाएपछि उनीहरूलाई पक्राउ गरिएको डिएसपी गौतमले बताए ।
बजारमा विभिन्न बहानामा चाडबाडको मौका छोपी यस्ता गतिविधि हुनसक्ने भन्दै कुनै पनि व्यक्तिहरू र सामग्रीको प्रलोभनमा नफस्न डिएसपी गौतमले सबैलाई आग्रह गरेका छन् ।