चितवनमा बाढी प्रभावित व्यक्तिको संख्या यकिन नहुँदा राहत वितरण प्रभावित भएको छ ।
सरकारबाट प्राप्त प्रतिव्यक्ति दैनिक ७० रुपैयाँ राहत रकम, संख्या यकिन नहुँदा राम्ररी वितरण गर्न सकिएको छैन जसका कारण एउटा नगरपालिकाबाहेक अन्य नगरपालिका र भरतपुर महानगरमा घरधुरीको आधारमा मात्रै न्यून राहत उपलब्ध गराइएको जिल्ला विपद् व्यवस्थापन समिति चितवनका स्रोत व्यक्ति हरिबाबु ढकालले जानकारी दिए ।
जिल्लामा बाढीबाट ४९९ घर पूर्ण क्षति भएको तथ्याँक छ । तर ती घरमा कतिजना मानिस प्रभावित भएका छन् भन्ने तथ्याँक माडी नगरपालिकाबाहेक अन्यबाट आउन नसकेको ढकालले बताए ।
माडीमा व्यक्ति संख्याका आधारमा रकम वितरण भएपनि अन्य क्षेत्रमा प्रभावित व्यक्ति संख्या प्राप्त नभएकाले क्षति भएको घरलाई एकजना मानेर अहिलेसम्म १४ लाख ६३ हजार ८ सय ४० रुपैयाँ राहत वितरण भएको छ ।
सरकारबाट प्राप्त रकम प्रतिव्यक्ति दैनिक ७० रुपैयाँका दरले भदौ महिनाभरको ३१ दिनको हिसाब गरेर सो रकम उपलब्ध गराइएको छ । माडीमा भने १२३ घरधुरी पूर्ण क्षति भएकोमा ३२३ जना प्रभावित भएको तथ्याँक आएकाले उनीहरूका लागि सात लाख ९ सय १० रुपैयाँ राहत वितरण भएको समितिले जनाएको छ ।
यस्तै, भरतपुर महानगरमा ८२ घरका लागि एक लाख ७७ हजार ९ सय ४० रुपैयाँ, रत्ननगर नगरपालिकामा १११ घरका लागि दुई लाख ४० हजार ८ सय ७० रुपैयाँ, खैरहनी नगरपालिकामा ३६ घरलाई ७८ हजार १ सय ३० रुपैयाँ, राप्ती नगरपालिकामा १३१ पीडित घरका लागि दुई लाख ८४ हजार २ सय ७० रुपैयाँ वितरण भएको ढकालले जानकारी दिए ।
इच्छाकामना गाउँपालिका र कालिका नगरपालिकाका पीडितलाई भने राहत वितरण बाँकी रहेको जिल्ला विपद् व्यवस्थापन समितिले जनाएको छ । भदौ महिनामा बाढी पीडितले प्रतिव्यक्ति दुई हजार १ सय ७० रुपैयाँ राहत पाउँछन् ।
अहिले घरधुरीअनुसारको रकम पठाएकाले तथ्याँक आएपछि अन्य बाँकीलाई राहत वितरण गर्ने विपद् समितिले जनाएको छ ।
चितवनका प्रमुख जिल्ला अधिकारी तथा विपद् व्यवस्थापन समितिका संयोजक नारायणप्रसाद भट्ट राहत वितरण प्रभावकारी गर्न निर्देशन दिएको बताउँछन् । रासस