पत्रकार हत्याको विरोधमा काठमाडौंमा प्रदर्शन हुँदै


भारतीय वरिष्ठ पत्रकार तथा सम्पादक गौरी लंकेशलाई गोली हानी हत्या गरेको विरोधमा नेपालका पत्रकार तथा लेखकहरूले काठमाडौंमा प्रदर्शन गर्ने भएका छन् ।

मंगलबार साँझ लंकेशलाई बैंगलोरस्थित उनकै निवास भित्र गोली हानी विभत्स हत्या गरेको विरोधमा नेपालका पत्रकार तथा लेखकहरू सडकमा ओर्लिन लागेका हुन् ।

दिउँसो तीन बजे माइतीघर मण्डलामा प्रदर्शन र शोकसभा गर्न लागेको नयाँ पत्रीका दैनिकका पत्रकार विरेन्द्र ओलीले जानकारी दिए । लेखक पत्रकारहरूले माइतीघरमा किन प्रदर्शन गर्नुपरेको भन्ने प्रश्नमा पत्रकार नरेश ज्ञवालीले भने, आज हामी जुन समाजमा बाँच्दैछौं त्यो समाजको स्वतन्त्रता, मानवतालाई हिन्दु अतिवादी फासिस्टहरूले ग्याँस च्याम्बरमा कैद गर्न न्वारनदेखि बल लगाइरहँदा हामी मानवतावादीहरू त्यसको विपक्षमा उभिनुपरेको हो ।

यसअघि, भारतमा बिजेपीको माउपार्टी कट्टर हिन्दुवादी संगठन आरएसएसका नरेन्द्र मोदी प्रधानमन्त्री भएपछि लेखेकै आधारमा नरेन्द्र दाभोलकर, डा. गोविन्द पानसरे र डा. एम.एम. कलबुर्गीको हत्या भइसकेको छ ।

जसको विरोधमा भारतका वैज्ञानिक, पत्रकार, लेखक, साहित्यकारहरूले राज्यद्वारा दिइएका सम्मान तथा पदवी फिर्ता समेत गरेका थिए । भारतमा गौरी लंकेशको मंगलबार साँझ भएको हत्यालाई यसै सन्दर्भमा गरिएको अर्काे हत्याको रूपमा हेरिएको छ ।

Share:

प्रतिकृया दिनुहोस

© 2017 Setopati Sanchar Pvt. Ltd.