नारायणगढ मुग्लिन सडकखण्डमा मुआब्जा वितरण


नारायणगढ मुग्लिन सडकखण्डको सडक छेउमा रहेका पहिरोको उच्च जोखिममा परेका ४५ वटा घर स्थानान्तरणको प्रक्रिया अन्तिम चरणमा पुगेको छ ।

मुआब्जा निर्धारण समितिले गठन गरेको उपसमितिले पेश गरेको मुआब्जा रकमलाई समितिले अनुमोदन गरी घरधनीलाई मुआब्जा लिन आउन आह्वान गरेको छ ।

प्रमुख जिल्ला अधिकारी नारायणप्रसाद भट्टका अनुसार ४५ वटा घर, गोठ, शौचालय, पसललगायतको मुआब्जा  एक करोड ४४ लाख १४ हजार रुपैयाँ निर्धारण गरिएको छ । विश्व बैंकको सहयोगमा सडक निर्माण भइरहेकाले अहिलेको भन्दा स्तरीय संरचना निर्माण गर्न बजेट पुग्ने गरी मुआब्जा निर्धारण गरिएको मुआब्जा निर्धारण उपसमितिका संयोजक नेत्रप्रसाद शर्माले बताए ।

विस्थापन भत्ता प्रतिघर २० हजार रुपैयाँ, अर्को घर नबन्दासम्मका लागि भाडा रकम  १० हजार रुपैयाँ, हाल व्यवसाय भए अर्को व्यवसाय नथालेसम्मका लागि  १० हजार रुपैयाँ र दलित जनजाति भएमा थप १० हजार रुपैयाँसमेत दिइने छ । सो कार्यका लागि  २० लाख ८० हजार रुपैयाँ वितरण गरिँदै छ ।

नारायणगढ मुग्लिन सडक आयोजनाले जिल्ला प्रशासन कार्यालयमा गत आवमा मुआब्जाका लागि  ५० लाख रुपैयाँ पठाइसकेको थियो । आयोजनाका इञ्जिनियर  शिव खनालका अनुसार थप रकम तत्काल पठाउन सकिने हुँदा प्रभावितले तुरुन्तै मुआब्जा रकम पाउने छन् ।

जीवनपयोगी सीप विकासका लागि आयोजनाले गत वर्ष पनि च्याउ, ब्रिकेट, बाख्रापालनलगायतका तालीम दिएको थियो । खनालका अनुसार यस वर्ष पनि त्यस्ता तालिम दिइने छ । तालिमपछि उनीहरूले काम गर्नका लागि १० हजार रुपैयाँ रकम पाउने छन् । उनीहरू बसेका सबै जमिन बाटो क्षेत्र पर्दछ । विश्व बैंकको सहयोगमा सडक विस्तार भएकाले व्यवस्थित स्थानान्तरण र जीवन सञ्चालनमा सहयोग पुर्‍याउने काम आयोजनाबाट हुनुपर्ने हुन्छ । सडक विस्तारका क्रममा ठाउँठाउँमा पहिरो खसेको र कतिपय ठाउँमा चौडा बनाउँदा स्थानीयवासीलाई स्थानान्तरण गर्नुपरेको हो । रासस

Share:

© 2017 Setopati Sanchar Pvt. Ltd.