थलीमा बालुवा तस्करी तीव्र


वर्षामा नदीबाट बालुवा निकाल्न रोकिए पनि कागेश्वरी मनोहरा नगरपालिकास्थित बाग्मती नदी किनारबाट दिउँसो बालुवा निकाली राति ट्रकका ट्रक चोरी तस्करी भइरहेको छ ।

नगरपालिकाको वडा नं ४ थलीस्थित बाग्मती नदी किनारमा बालुवाको थुप्रो देख्न सकिन्छ । यहाँ बिहानैदेखि एक दर्जन कामदार नदीमै पसेर बालुवा निकाली रहेका भेटिन्छन् । नदीसँग जोडिएको सार्वजनिक जग्गामा रहेको बालुवाको ढिस्कोबाट पनि बालुवा निकालिएको छ ।

स्थानीय श्याम सिम्खडा महानगरीय प्रहरी प्रभाग थलीले बालुवा झिक्ने समूहसँग मिलेमतो गरी नदी र सार्वजनिक जग्गाबाट बालुवा निकाली चोरी तस्करी भइरहेको बताउँछन् ।

प्रहरी प्रभाग थलीका प्रहरी हवल्दार विनेश कार्की भने बालुवा झिकेको सूचना पाएर समात्न जाँदा बालुवा तस्करले बाटोमा राखेका मानिसले फोन गरेर भगाउने गरेकाले साबेल मात्र समातेर ल्याउनु परेको सुनाउँछन् । तस्करले काम लगाएका कामदारको २५ वटा साबेल कार्यालयमै रहेको उनले बताए ।

महानगरीय प्रहरी वृत्त बौद्धका प्रहरी उपरीक्षक अच्युतम् पुडासैनी भने जिल्ला समन्वय समिति काठमाडौंबाट बिल ल्याएर बालुवा लैजाने गरेकाले कारबाही चलाउन नसकिएको बताउँछन् ।

जिल्ला समन्वय समितिका प्रमुख गोपाल अधिकारी स्वीकृत प्राप्त र नवीकरण भएका खानी एवं वर्षायाममा बाढी आउने खहरेले थुपारेको बालुवा झिक्न मात्र ठेक्का लगाइएको दाबी गरे ।

बाग्मती नदीबाट भने बालुवा निकाल्न प्रतिबन्ध लगाइएको उनले जानकारी दिए । बाग्मतीबाट निकालिएको बालुवा समातेर कारबाही गर्न सकिने समन्वय समितिले जनाएको छ । रासस

Share:

© 2017 Setopati Sanchar Pvt. Ltd.