नेकपा (एमाले)का उपमहासचिव विष्णु पौडेलले प्रदेश नम्बर ५ लाई विभाजन गर्ने प्रयास असफल बनाएजस्तै बुटवललाई प्रदेशको राजधानी हुन रोक्न खोज्ने प्रयासलाई पनि असफल बनाइने बताएका छन् ।
बुटवल उपमहानगरपालिकाले आर्थिक वर्ष २०७४/७५ को बजेट, नीति तथा कार्यक्रम सार्वजनिक कार्यक्रमलाई आज यहाँ सम्बोधन गर्दै उनले बुटवल उपमहानगरको बजेट तथा कार्यक्रम नगरका जनताको भावनाअनुकूल आएको बताए ।
उनले बुटवलका जनताको स्वस्थ्य, शिक्षा, खानेपानी विकासका पूर्वाधारलगायत बुटवलको सबैभन्दा समस्याको रूपमा रहेको अव्यवस्थित बसोबासको समस्या समाधानमा केन्द्रीत भएको बताउँदै अब यसको पूर्णतया कार्यान्वयनमा जनप्रतिनिधिको ध्यान जानु जरुरी छ भने ।
गत साउन ३२ गतेबाट सुरू भई भदौ ११ गते सम्पन्न नगरसभा बैठकले पारित गरेको बजेट, नीति तथा कार्यक्रम आज सार्वजनिक गरिएको हो । उप–महानगरपालिकाले आर्थिक वर्ष २०७४/७५ का लागि एक अर्ब ६३ करोड रुपैयाँको बजेट सार्वजनिक गरेको छ ।
नगरसभाले चालू आर्थिक वर्षका लागि आर्थिक एवं विनियोजन ऐनद्वारा नगर सञ्चित कोषमा व्ययभार हुने गरी एक अर्ब ६३ करोड ३५ लाख ७८ हजार ८ सय ५ रुपैंयाँको बजेट पारित गरि सार्वजनिक गरिएको हो ।
आर्थिक वर्ष ०७४/०७५ को बजेट, नीति तथा कार्यक्रम नगर प्रमुख शिवराज सुवेदीले बजेट सार्वजनिक गर्दै नगरबासीको विकासको चाहनालाई साधन र स्रोतले भ्याएसम्म समेट्ने प्रयास गरिएको बताए ।
बजेटमा पूर्वाधार विकास तथा सामाजिक विकास कार्यक्रमका लागि विनियोजन गरिएको कुल बजेटमध्ये क्रमागत केन्द्रीय तथा नगरस्तरीय योजना कार्यक्रमका लागिएक अर्ब २५ करोड ७२ लाख ९७ हजार ८ सय ५ रुपैयाँ विनियोजन गरिएको छ । त्यस्तै सामाजिक विकास तथा अन्य लक्षित विकास कार्यक्रमका लागि कुल आठ करोड १२ लाख पाँच हजार रुपैयाँ विनियोजन गरिएको छ ।
सामाजिक विकास कार्यक्रमअन्तर्गत महिला विकास कार्यक्रमका लागि एक करोड ५ लाख रुपैयाँ निर्धारण गरिएको छ । यसैगरी युवा तथा बालबालिका विकास कार्यक्रमका लागि सामाजिक विकासतर्फकै बजेटबाट कुल चार करोड ४६ लाख रुपैयाँ विनियोजन गरिएको छ । रासस