महानगरीय ट्राफिक प्रहरीले काठमाडौंको गौशाला क्षेत्रमा आज गाडी चलाउन रोक लगाएको छ ।
तीजका कारण पशुपतिनाथ दर्शन गर्न जाने दर्शनार्थीको घुइँचो भएकाले मन्दिर आसपासका क्षेत्रमा गाडी चलाउन रोक लगाएको हो।
मालवाहक गाडीका लागि तीनकुनेबाट गौशाला र गोपिकृष्णबाट चाबहिलतर्फ जान तथा नारायणटार पुलबाट करिडोरको बाटो भइ आउने सबै मालबाहक गाडीलाई पनि रोकिएको ट्राफिक प्रहरीले जनाएको छ।
बिहीबार नयाँ बानेश्वर तीनकुने भएर चल्ने तथा रिङरोड परिक्रमा गर्ने गाडीलाई पुरानो बसपार्क, भद्रकाली, माइतीघर, बानेश्वर, तीनकुने हुँदै तिलगंगासम्म जाने र त्यहि रुट भएर फर्किने व्यवस्था गरिएको छ।
यस्तै रातोपुल, गौशाला, चावहिल हुँदै बौद्धतर्फ जाने गाडी पुरानो बसपार्क, भद्रकाली, भोटाहिटी, जमल, केशरमहल, खानी विभाग, लाजिम्पाट, नारायणगोपाल चोक, सुकेधारा, चावहिल हुँदै चल्ने व्यवस्था मिलाइएको ट्राफिक प्रहरीले जनाएको छ ।
यस्तै कलंकी, हलचोक, बालाजु, महाराजगन्ज भएर चल्ने गाडी सुकेधारा भएर चल्ने व्यवस्था गरिएको छ । रातोपुल गौशाला भएर चावहिल तर्फ चल्ने गाडीलाई भद्रकाली, सुन्धारा, भोटाहिटी जमल हुँदै चल्ने व्यवस्था मिलाइएको ट्राफिक प्रहरीले जनाएको छ ।
