वारेकोट गाउँपालिका–३ मा भाइरल ज्वरो र टाइफाइडबाट दुई नाबालकको मृत्यु भएको छ ।
स्थानीयवासी वीरबहादुर रोकायका ११ महिनाका छोरा धीरेन्द्र र जयबहादुर रोकायका नौ महिनाका छोरा मानबहादुरको सोमबार मृत्यु भएको स्थानीय शिक्षक रामबहादुर शाहीले जानकारी दिए ।
गाउँमा अहिले भाइरल ज्वरोबाट सयौँ नागरिक बिरामी भएका छन् । स्वास्थ्य संस्था लिम्साभन्दा टाढा रहेका कारण स्थानीयवासीले समयमै उपचार नपाएको शाहीले बताए । ‘बालबालिकादेखि वृद्धवृद्धा सबै बिरामी छन्, बिरामीलाई पाँच घण्टासम्म बोकेर अस्पतालसम्म लैजानुपर्ने अवस्था छ,’ उनले भने ।
यस्तै, त्रिवेणी नलगाँड–८ हल्चौरमा समेत भाइरल ज्वरोका कारण सयौँ बासिन्दा बिरामी परेका पञ्च भयार माध्यमिक विद्यालयका शिक्षिका नन्दा शाही केसीले जानकारी दिईन् । तीन घण्टा लगाएर रुकुमको आठविसकोट नगरपालिकाको राडीस्थित मेडिकलमा लगेर उपचार गर्नु परिरहेको उनले बताईन् ।
‘घरका सबै बिरामी छन्, पशुचौपायलाई घाँस, पानी दिन समेत समस्या भएको छ,’ उनले भने । रासस