मनुमित्र कार्यक्रम नतिजामुलक बनाउनु पर्छ


काठमाडौं महानगरका प्रमुख विद्यासुन्दर शाक्यले महानगरको सामुदायिक कुकर व्यवस्थापन कार्य नतिजामुलक हुनुपर्ने बताएका छन्। आइतबार मनुमित्र कार्यक्रमका साझेदारसँगको बैठकमा बोल्दै प्रमुख शाक्यले भने, ‘२२ हजार कुकुरको संख्या कहिलेसम्ममा स्थिर हुन्छ? कहिलेदेखि संख्यामा न्युनीकरण हुन्छ? कार्ययोजनासहित कार्यक्रम अघि बढाउनु पर्‍यो।

उपमेयर हरिप्रभा खड्गीसहितको बैठकमा प्रमुख शाक्यको भनाइ थियो-विगतका सम्पन्न कामको समीक्षा गरौं, आगामी कामलाई ठोस बनाऔं ।

सम्पन्न कामका विषयमा कार्यपत्र प्रस्तुत गर्दै मनुमित्र कार्यक्रमकी कार्यक्रम व्यवस्थापक सारा भ्यालेन्टाइनले महानगरका १७ वटा वडामा कार्यक्रम पुगिसकेको र ५६ जना पशु व्यवस्थापन सहायकलाई तालिम दिइसकिएको जानकारी दिइन्।

‘वर्षे परियोजनाको पहिलो वर्ष संस्थागत संरचना निर्माण तथा कार्यक्रमको ढाँचा तयार पार्नुपर्ने भएकोले कुकुर बन्ध्याकरणको संख्या कम देखिएको हो, विगतको तुलनामा अवका कार्यक्रममा चाँडो काम हुन्छ,’ कार्यक्रम प्रवन्धक भ्यालेन्टाइनले भने।

कुकुर व्यवस्थापन परियोजना कुकुरका लागि होइन, यो त वातावरणीय सुधार, सहरी स्वास्थ्यको प्रवर्धन र मानव जीवन सहजताका लागि भएकाले यसरी हेर्न सकिएन भने कार्यक्रमका गुण देख्न नसकिने छलफलका वक्ताहरूले बताए।

सडकमा भएका सामुदायिक कुकुर व्यवस्थापन गर्ने, घरपालुवा कुकुरलाई दर्ता गर्ने, विधिको पालना गरेर मात्र कुकुर पाल्ने व्यवस्था गर्ने तथा पशुकल्याणमा आधारित सहरी आचरण निर्माणका लागि हरेक वडामा वडाध्यक्षको संयोजकत्वमा वडास्तरीय पशु व्यवस्थापन समिति र महानगरमा यसको संयोजन गर्न छुट्टै संयन्त्र तयार गर्ने परियोजनाको लक्ष्य संस्थाले लक्ष्य लिएको छ।

Share:

© 2017 Setopati Sanchar Pvt. Ltd.