युवा संघ नेपालद्वारा प्राकृतिक प्रकोप प्रभावितलाई सहयोग


युवा संघ नेपालले बाढीपहिरो तथा प्राकृतिक प्रकोपबाट प्रभावित भएकालाई राहत तथा आर्थिक सहयोग उपलब्ध गराउन अध्यक्ष राजीव पहारीको नेतृत्वमा ४५ सदस्यीय टोली आज प्रभावित क्षेत्रमा प्रस्थान गरेको छ ।

सप्तरीमा मृत्यु भएका बालकको परिवारलाई २५ हजार रुपैयाँ आर्थिक सहयोग गरी सुनसरी, मोरङ, झापालगायत स्थानमा पीडितलाई स्थानीय प्रशासनसँग समन्वय गरी राहत उपलब्ध गराइने छ ।

यसअघि संगठनका उपाध्यक्ष रमेश पौडेलको नेतृत्वमा सप्तरीलगायत अन्य प्रभावित क्षेत्रमा भएको धनजनको क्षतिको अवस्था बुझ्न एक टोली त्यहाँ गएको थियो । सो टोलीलाई पार्टीका पोलिटब्यूरो सदस्य महेन्द्रबहादुर पाण्डेले बिदाइ गर्दै प्राकृतिक विपद्मा परेका नागरिकलाई मानवीय सेवाको भावनाले सक्दो सहयोग गर्न निर्देशन दिए ।

अध्यक्ष पहारीले तराई तथा मधेशमा गएको बाढी र पहिरोबाट प्रभावितलाई गाँस, बास र कपासको खाँचो रहेकाले विभिन्न क्षेत्रबाट उत्साहका साथ राहत संकलन गर्नुपर्ने बताए ।

उपाध्यक्ष दिलु पन्तले प्रत्येक वर्ष वर्षामा यस किसिमको समस्या आइरहने हुँदा समस्याको दीर्घकालीन समाधानका लागि कूटनीतिक पहल गर्न माग गरे । मकवानपुर, चितवन, नवलपरासी, पर्सालगायत क्षेत्रमा पनि सो संघले राहत वितरण गरेको जनाइएको छ । रासस

Share:

© 2017 Setopati Sanchar Pvt. Ltd.