शुक्रबार बेलुकादेखि आएको निरन्तर वर्षाका कारण बेलका नगरपालिका– ४ र ५ स्थित सिसुवा खोला र सेती खोलामा भीषण बाढी आउँदा धान बालीमा ठूलो क्षति भएको छ ।
स्थानीय लालसिसुवाका दीपक परियारका अनुसार सिसुवा खोलामा आएको बाढी धानबालीमा पसेपछि सिसुवाखोला आसपासमा पच्चीस बिगाहा भन्दा बढी खेतको धानबाली नष्ट भएको छ ।
यस्तै, सेतीखोलाको बाढीका कारण बीसैँ बिगाहा जग्गाको धानबाली पुरिएको स्थानीय धनबहादुर भुजेलले बताए । शनिबार आएको भीषण बाढीले बेलकाको जहडामा केही विद्युतको पोलसमेत ढालेर विद्युत् अवरुद्ध बनाएको स्थानीयवासी होमबहादुर मगरले बताए । ठोक्सिला इलाका प्रहरी कार्यालयका प्रहरी निरीक्षक सुवास राईले पनि ती स्थानमा बाढीले क्षति पुर्याएको पुष्टी गरेका छन् ।
वर्षाका कारण क्षतिका सम्बन्धमा तथ्यांक संकलन गर्न समेत समस्या भएको प्रहरी उनले बताए ।
निरन्तर बाढी आएपछि बेलका क्षेत्रका सेतीखोला, लालसिसुवा खोला आसपास बसोवास गर्दैआएका स्थानीयवासी सुरक्षितस्थानतर्फ सर्न थालेको पनि स्थानीयले जनाएका छन् ।
यस्तै भीषण वर्षाका कारण त्रियुगा नगरपालिका– ११ बरुवा खोलामा आएको बाढीले शनिबार स्थानीय अनिष खड्काको एउटा ट्याक्टर बगाएको स्थानीयवासी राजकुमार राउतले बताए ।
नदीले ट्याक्टर बगाए पनि ट्याक्टर चालकले भने बाढीमा पौडिएर ज्यान बचाएको उनले जानकारी दिए । रासस
