बन्ने भयो रक्षा मन्त्रालयको नयाँ भवन


रक्षा मन्त्रालयको नयाँ भवन बन्ने भएको छ ।

बुधबार बिहान प्रधानमन्त्री शेर बहादुर देउबाले सिंहदरबारको दक्षिण पश्चिममा रहेको नेपाली सेनाको क्याबलरी (घोडा स्याहार केन्द्र ) गुल्म रहेको स्थानमा रक्षा मन्त्रालयको नयाँ भवन निर्माणको शिलान्यास गरेका हुन् ।

७२ सालको भूकम्पले रक्षा मन्त्रालय रहेको सिंहदरबारको मुख्य भवन प्रयोग गर्न नमिल्ने गरी क्षति पुगेपछि मन्त्रालय भवनविहिन बनेको थियो।
बेसमेन्ट र कौसी भाग बाहेक ५ तलाको हुने नयाँ भवन ५९४७.१६ वर्ग मिटरमा बन्ने भएको छ । २०७७ असारमा निर्माण सम्पन्न गर्ने गरी डाँफे समानान्तर जेभीले ठेक्का पाएको यो भवनको लागत १९ करोड ३३ लाख ४ हजार  रुपैयाँ रहेको छ। १ सय ५ वटा कोठा रहने भवन भूकम्प प्रतिरोधी हुनुका साथै अग्नि निरोधक प्रणाली जडान भएको हुनेछ।

शिलान्यास कार्यक्रममा बोल्दै प्रधानमन्त्री शेर बहादुर देउवाले भवन निर्माणमा आर्थिक अनुशासनको पालना र तोकिएको समयमा नै निर्माण सम्पन्न गर्न निर्देशन दिए ।

निर्माण हुने भवन अपाङ्ग मैत्री, प्राकृतिक वातारणीय अनुकुल  र लिफ्ट सहितको हुनेछ। भूकम्पपछि आफ्नो भवन नहुँदा मन्त्रालय सिंहदरबारभित्र रहेको राष्ट्रिय सुरक्षा परिषद्को भवनमा रहेको छ। मन्त्रालयको दैनिक कार्य संचालन हुँदैआएपनि पर्याप्त कोठा र कार्यालय सुविधा नहुँदा काम प्रभावित हुँदै आएको छ।

Share:

प्रतिकृया दिनुहोस

© 2017 Setopati Sanchar Pvt. Ltd.