प्राधिकरणले बिहिबारदेखि छूट सर्वेक्षणको काम शुरू गर्ने

प्राधिकरणले बिहिबारदेखि छूट सर्वेक्षणको काम शुरू गर्ने




राष्ट्रिय पुनर्निर्माण प्राधिकरणले आगामी साउन २६ गतेदेखि दुई चरणमा सम्पन्न हुने गरी गुनासो फर्छ्यौटमार्फत छूट सर्वेक्षण तथा पुनः जाँच सर्वेक्षणको काम शुरू गर्ने भएको छ ।

प्राधिकरणले आगामी २६ गतेबाट पहिलो चरण अन्तरगत भूकम्प अतिप्रभावित ८ जिल्लामा छूट सर्वेक्षण तथा पुनः जाँच सर्वेक्षणको काम शुरू गर्ने भएको हो । यसका लागि सर्वेक्षणमा खटिने इञ्जिनियरहरूको तीन दिने तालिम पनि आजबाट शुरू भएको छ । काठमाडौंमा शुरू भएको तालिममा १ सय ६८ जना इञ्जिनियरहरू सहभागी भएका छन् ।

तालिमको उदघाटन गर्दै प्राधिकरणका सदस्य सचिव सर्वजीतप्रसाद महतोले भूकम्प पीडितहरुलाई छिटो र छरितो रुपमा सेवा दिने दायित्व सबैको भएको बताए । उनले भूकम्पपछिको पुनर्निर्माणको कामलाई छिटो र छरितो रुपमा सम्पन्न गर्न इञ्जिनियरहरू पनि जिम्मेवारी हुनुपर्नेमा पनि जोड दिए । उनले निरन्तर पराकम्पले दिएको त्रासका कारण कतिपय ठाउँमा सर्वेक्षणको काम छूट हुन गएको पनि स्पष्ट पारे ।
‘प्राधिकरणले पहिलो चरणमा अति प्रभावित ओलखढुंगा, रामेछाप, दोलखा, सिन्धुपाल्चोक, काभ्रे पलाञ्चोक, नुवाकोट, रसुवामा गोरखामा छूट सर्वेक्षण तथा पुनः जाँचको काम शुरू गर्नेछ,’उनले भने, ‘दोस्रो चरणमा काठमाडौं, ललितपुर, भक्तपुर, सिन्धुली, मकवानपुर र धादिङमा काम शुरू हुनेछ ।’

दोस्रो चरणको काममा १ सय ६४ जना इञ्जिनियरहरू परिचालन हुने र उनीहरूका लागि आगामी साउन २६ गतेबाट तालिम दिने कार्ययोजना तय गरिएको पनि प्राधिकरणका सदस्य सचिव महतोले जानकारी दिए । प्राधिकरणले आगामी भदौं मसान्तसम्म सबै गुनासो सम्बोधन हुने गरी छूट सर्वेक्षण तथा पुनः जाँच सर्वेक्षणको काम सम्पन्न गर्ने लक्ष्य लिएको छ । भूकम्प अति प्रभावित १४ जिल्लामा ८१ हजार ८२ परिवारको पुनः जाँच र ५२ हजार २ सय ८७ जना परिवारको छूट सर्वेक्षण गर्नुपर्ने प्राधिकरणको तथ्यांकमा उल्लेख गरिएको छ । प्राधिकरणले पुनर्निर्माणको कामलाई सफल बनाउन पनि सबैमा अपिल गरेको छ ।

प्रतिकृया दिनुहोस

© 2017 Setopati Sanchar Pvt. Ltd.