गत साउन ५ गते तुलसीपुर १३ वखरियामा मोटरसाइकलको ठक्करबाट मृत्यु भएकी ३८ वर्षीय जानका चौधरीको शव राप्ती अञ्चल अस्पतालमै रहेको छ ।
११ दिनअघि मृत्यु भएकी चौधरीका आफन्तले उचित क्षतिपूर्ति र दोषी चालकलाई कारबाहीको माग गर्दै शव बुझ्न नमानेपछि शव अस्पतालमै रहँदै आएको अस्पताल प्रशासनले जानकारी दिएको छ ।
मृतकका श्रीमान् तुलसीराम चौधरीले साउन पाँच गते बिहानै खेतमा जाँदै गरेकी आफ्नी श्रीमती जानकालाई तीव्र गतिमा आएको मोटरसाइकलले घर अगाडि नै ठक्कर दिएको हुँदा दोषीलाई हदै सम्मको कारबाही हुनुपर्ने अडान लिँदै आएका छन् ।
तुलसीपुर उपमहानगरपालिका वडा नं. १३ रनियापुर निवासी विनोद सार्कीले चलाएको रा.१ प ४३३७ नम्बरको मोटरसाइकले चाैधरीलाई ठक्कर दिएको ईलाका प्रहरी कार्यालय तुलसीपुरले जानकारी दिएको छ । ‘चालकको लापरवाहीले गर्दा आफ्नी श्रीमतीको अकालमै मृत्यु भएको हुँदा चालकलाई हदै सम्मको कारवाही हुनुपर्ने हाम्रो माग हो ।’ तुलसीराम चौधरीले भने । यसैबीच ईलाका प्रहरी कार्यालय तुलसीपुरका प्रमुख लोकनाथ तिम्सिनाले दुवै पक्षबीच छलफल र वार्ता भैरहेको हुँदा छिट्टै समस्या समाधान हुने बताएका छन् ।