स्वदेशमै राम्रो उपचार सेवा उपलब्ध गराउनुपर्छ- प्रधानमन्त्री


प्रधानमन्त्री शेरबहादुर देउवाले सबैले सर्वसुलभ र सहज ढंगले देशका सबै अस्पतालमा उपचार गराउन सक्ने वातावरण बनाउनु पर्ने बताएका छन् ।

नेपालकै जेठो वीर अस्पतालको १२८औँ वार्षिकोत्सवको बिहिबार उद्घाटन गर्दै प्रधानमन्त्री देउवाले गुणस्तरीय स्वास्थ्य सेवा उपचारका लागि नेपालीहरु भारतलगायत तेस्रो मुलुकमा जाने परिपाटी अन्त्य गरी स्वदेशमै राम्रो उपचार सेवा उपलब्ध गराउनुपर्ने आवश्यकता औँल्याए।

नेपालकै पुरानो अग्रणी स्वास्थ्य संस्थाका रुपमा रहेको वीर अस्पतालले सोअनुरुपको सेवा र सुविधा प्रदान गर्न अहम् भूमिका खेल्नुपर्ने धारणा प्रधानमन्त्री देउवाले व्यक्त गरे ।

उनले भने – ‘स्थापनाकालदेखि वीरले बिरामीको स्वास्थ्य उपचारमा दिएको योगदान प्रशंसायोग्य छ, चिकित्सकीय जनशक्ति उत्पादन गरी देशका कुनाकाप्चामा उपचार सेवा दिएको छ, सबैलाई स्वदेशकै उपचार राम्रो हुन्छ भन्ने विश्वास बढाउन यस अस्पतालले भूमिका खेल्नेछ भन्ने आशा लिएको छु ।’

प्रधानमन्त्री देउवाले सरकारले अस्पताललाई विशेषज्ञ केन्द्रका रूपमा विकास गरी अझ विश्वासिलो बनाउन पर्याप्त बजेटसहित अन्य आवश्यक सहयोग गर्ने प्रतिबद्धता व्यक्त गरे ।

स्वास्थ्यमन्त्री गिरिराजमणि पोखरेलले देशभरका जनताको विश्वासिलो अस्पताल भएकाले संविधानमा उल्लेख भएका स्वास्थ्यसम्बन्धी हकलाई कार्यान्वयन गर्न भूमिका खेल्नुपर्ने बताए ।

वर्तमान चुनौतीलाई सामना गर्दै भोलिका लागि काम गर्नुपर्ने भन्दै उनले भने – ‘भूकम्पपछि पुनःनिमार्णलाई अघि बढाउँदै अन्तर्राष्ट्रियस्तरको स्वास्थ्य सेवाको गुणस्तरीय वृद्धिका लागि चाहिने अत्याधुनिक उपकरण र विशेषज्ञ सेवा विस्तार गर्ने काम प्राथमिकतामा छ ।

पूर्व स्वास्थ्यमन्त्री गगनकुमार थापाले वीरमा भन्दा राम्रो जनशक्ति अन्य अस्पतालमा नभएकाले यहाँको उपचार उत्कृष्ट हुनुपर्ने बताए ।

अस्पतालका निर्देशक प्रा डा भूपेन्द्र बस्नेतले ऐतिहासिक अस्पतालका रुपमा रहेको वीर अस्पतालले गरिब असहाय, निमुखा, मध्यम एवं अति विशिष्ट व्यक्तित्वलाई गुणस्तरीय र विशेषज्ञ सेवा दिँदै आएको उल्लेख गरे ।

उनले पहिले कर्मचारी आवास र नर्सिङ क्याम्पस रहेको भवन भत्काई सो १७ रोपनी जग्गामा अत्याधुनिक नयाँ साततले सर्जिकल भवन बनाउने कार्य अगाडि बढाइएको बताए ।

विसं १९४७ साउन १२ गते १५ शैय्याबाट सञ्चालनमा ल्याएको वीर अस्पताल हाल ४६० शैय्यामा विस्तार भएको पूर्ण सरकारी स्वामित्वको अस्पताल हो । रासस

Share:

प्रतिकृया दिनुहोस

© 2017 Setopati Sanchar Pvt. Ltd.