‘पुस्तकमाथि पाठकको पहुँच’ भन्ने नाराका साथ पठनसंस्कृति निर्माण र व्यवसाय प्रवर्द्धनकै सिलसिलामा साझा प्रकाशनले पाठकहरूको घरदैलोसम्म सुलभ ढङ्गले पुस्तक पुर्याउन त्रिभुवन विश्वविद्यालय कीर्तिपुर परिसरबाट घुम्ती पुस्तक प्रदर्शनीको अभियान शुरु गरेको छ । यस प्रदर्शनीमा पाठकहरूलाई विशेष छूटमा पुस्तक उपलब्ध गराउने व्यवस्था गरिएको छ ।
पाठककले पुस्तक खोज्दै हिँड्ने परिपाटीलाई अन्त्य गर्दै साझा प्रकाशनको इतिहासमा पहिलोपटक आफैँ पुस्तकका लागि पाठक खोज्नका लागि घुम्ती पुस्तक प्रदर्शनीको थालनी गरेको हो । यो अभियान उपत्यकाका मुख्य स्थान तथा उपत्यका बाहिर बुटवल, चितवन, विराटनगर, पाल्पा लगायतका स्थानमा संचालन गरिने छ । यसलाई क्रमिक रूपमा सबै नगरपलिका र गाउँपालिका पुर्याइने छ ।
प्रकाशनले प्राज्ञिक /शैक्षिक क्षेत्रमा गर्दै आएका अन्य सेवाका अतिरिक्त पठनसंस्कृति निर्माण वा पढ्ने बानीको विकास, पुस्तकमा पाठकको पहुँच, चेतना अभिवृद्धि तथा ज्ञानको स्रोत सङ्कलनमा अवसर, पाठक र लेखकबीचको सम्बन्ध विस्तारका आदिका लागि विभिन्न पुस्तक प्रदर्शनीहरू गर्दै आएको छ ।