नेपाल मजदूर किसान पार्टीका अध्यक्ष नारायणमान बिजुक्छेंले मङ्गलबार भक्तपुर नगरपालिका र चाँगुनारायण नगरपालिका (साविकको सुडाल गाविस) जोड्ने नव निर्मित गोसं पुल उद्घाटन गरेका छन् ।
निर्माण भएको पुलको उद्घाटन गर्दै उनले स्थानीय निकाय र जनताको सक्रियतामा विकास कार्यलाई तीव्रता दिनसके काम सफल हुने बताए ।
नेपाल सरकारको आर्थिक सहयोग र स्थानीय सडक पुल सहयोग एकाइको प्राविधिक सहयोगका साथै भक्तपुर जिल्ला समन्वय समिति र स्थानीय जनताको संयुक्त पहलमा कुल रु एक करोड २४ लाख एक हजार ८३३ को लागतमा १० दशमलव ६ मिटर लम्बाइ र ७ दशमलव २ मिटर चौडाइको पुल निर्माण भएको स्थानीय विकास अधिकारी ध्रुब बहादुर कोइरालाले जानकारी दिए ।
विसं २०७३ मा भण्डारी थुतुङ एण्ड श्यामबाबु जेभी कम्पनीले उक्त पुल बनाउने सम्झौता गरेर रु १२ लाखको पहिलो किस्ता पुल भत्काउने काम गरे पनि पुल बनाउने काम नगरेपछि स्थानीयको सहयोगमा पुल निर्माण गरिएको हो ।
जिल्ला प्राविधिक कार्यालयकी इञ्जिनियर सरिता उपाध्यायले रु ९० लाखको काम भए पनि रु एक करोड छ लाखको रकम भुक्तानी भएको बताउँदै वातावरीयण सुधार, खोलाको संरक्षणलगायतका १० प्रतिशत काम बाँकी रहेको बताईन् । काम गर्न नसकेकै आधारमा ठेकेदार कम्पनीलाई रु आठ लाख ६१ हजार ९२८ जरिवाना तिराएसंगै जिल्ला समन्वय समितिले ठेक्का रकम मै पुल निर्माण गर्ने गरी स्थानीय सुडाल रोड इँटा व्यवसायी समितिलगायतको सहयोगमा पुल निर्माण गरेको हो । रासस