भूकम्प गएको दुई वर्ष बित्दा खोटाङमा बल्ल पहिलो किस्ताबापतको रकम वितरण


भूकम्पपीडितका लागि पहिलो किस्ताबापत खोटाङमा हालसम्म ३६ करोड तीन लाख ७७ हजार रुपैयाँ रकम वितरण गरिएको छ । सो कार्यका लागि जिल्लामा ३७ करोड ५१ लाख १७ हजार रुपैयाँ रकम आएको थियो । कुल आठ हजार ४४३ लाभग्राही रहेको यो जिल्लामा पुरानो संरचनाअनुसार दुर्छिम र चिप्रिङ गाविसबाहेकका लाभग्राहीलाई उक्त बराबरको रकम वितरण गरिएको हो ।

तथ्यांक संकलनका क्रममा दुर्छिम र चिप्रिङ गाविसका लाभग्राहीको नाम र सम्झौता नम्बर फरक परेकाले तत्काल वितरण गर्न नसकिएको आयोजनाका निर्देशक ईश्वरचन्द्र मरहट्टाले जानकारी दिए । ‘उनीहरूको हकमा सच्याउने काम भइरहेको छ,’ उनले भने – ‘प्राविधिक कुरा मिल्नासाथ वितरण गरिन्छ ।’

पहिलो किस्ताबापतको रकम आगामी कात्तिक मसान्तसम्म वितरण गरिने जनाइएको छ । लाभग्राहीका लागि जिल्लामा राष्ट्रिय वाणिज्य बैंक, सेन्चुरी कमर्शियल बैंक, बैंक अफ काठमाडौं र सालपा विकास बैंकमार्फत भुक्तानी दिने व्यवस्था मिलाइएको बताइएको छ ।

कमप्रभावित १७ जिल्लामध्ये लाभग्राहीका लागि छिटो रकम वितरण गर्नेमा खोटाङ पहिलो भएको दाबीसमेत गरिएको छ । भूकम्प गएको दुई वर्ष बितिसक्दा पनि जिल्लामा पुनर्निर्माणको काम भने प्रभावकारी रूपमा हुन सकेको छैन । रासस

Share:

© 2017 Setopati Sanchar Pvt. Ltd.