वैदेशिक रोजगारीमा ठगिनु भएको छ ? अब उद्धारका लागि स्थापना भयो ‘सहायता कक्ष’


श्रम तथा रोजगार मन्त्रालयमा वैदेशिक रोजगारीका ठगी तथा उद्धारसम्बन्धी घटनाका लागि ‘सहायता कक्ष’ स्थापना भएको छ । बुधवार राजधानीमा आयोजित एक कार्यक्रममा श्रम तथा रोजगारमन्त्री फरमुल्लाह मन्सुरले उक्त सहायता कक्षको उद्घाटन गरेका हुन् ।

सो अवसरमा उनले  वैदेशिक रोजगार विभाग र वैदेशिक रोजगार प्रवर्द्धन बोर्डसँग समन्वय गर्ने गरी  कक्षले काम गर्ने जानकारी दिए ।  उनले भने, ‘दिनहुँ वैदेशिक रोजगारीका अनेक समस्या लिएर म कहाँ विभिन्न व्यक्ति आइरहनुभएको छ, उहाँहरूले अब यही कक्षमा जानकारी गराए पनि माग सम्बोधन हुनेगरी व्यवस्था मिलाएका छौँ ।’ कुनै समस्या परे विभाग र बोर्डमा गएर जानकारी वा उजुरी दिनु नै उपयुक्त व्यवस्था हुने तर त्यहाँ समाधान त्यहाँबाट सुनुवाइ नभए यहाँ आएर पनि निवेदन दिन सकिने मन्त्री मन्सुरले बताए । वैदेशिक रोजगारीलाई सुरक्षित, मर्यादित र अत्यधिक लाभदायक बनाउन आफू प्रयत्नशील रहेको उनको  भनाइ छ । उनले  निःशुल्क टिकट र प्रवेशाज्ञाको विषयलाई थप प्रभावकारी र लाभदायी बनाउन गृहकार्य भइरहेको जानकारी दिए ।  उनले भने, ‘म व्यक्तिगत लाभमा चल्ने मान्छे होइन, म रहुँञ्जेल विभाग र बोर्डमा पनि लाभ लिने गरी काम गर्नेलाई छोड्दैन ।’ पीडितले मन्त्रालयमै आएर, फोन वा इमेलमार्फत पनि आफ्ना गुनासो वा उजुरी दर्ता गर्न सक्नेछन् । कक्षको फोन नं ०१४२११६९६, भाइबर ९८४६०३१२८१  रहेको छ । रासस

Share:

© 2017 Setopati Sanchar Pvt. Ltd.