मधेश प्रदेशका मुख्यमन्त्री जितेन्द्र सोनलले 'मोन्था चक्रवात' ले उच्च जोखिम ल्याउन सक्ने भएकोले सचेत रहन आग्रह गरेका छन्।
प्रदेश विपत व्यवस्थापन कार्यकारी समितिको बैठकपछि बोल्दै मुख्यमन्त्री सोनलले नदी किनार बस्तीका नागरिकहरुलाई नजिकैको उच्च स्थानमा रहेका सुरक्षित भवन, धर्मशाला, विद्यालय तथा सार्वजनिक भवनमा तत्काल सर्न आग्रह गरेका हुन्।
‘आफ्नो अमूल्य जीवन र परिवारलाई सुरक्षित राख्नु पहिलो प्राथमिकता हो। सजग, सतर्क र संयमित रहनुहोस्,’ उनले भने।
भारतको बंगालको खाडी भएर भोलि दिउँसो १२ बजेतिर मधेश प्रदेशका ७ जिल्लासहित २६ जिल्लाहरूमा 'मोन्था' नामक समुद्री चक्रवातको प्रभाव देखिने र मौसम बदली भई वर्षा हुने जल तथा मौसम पूर्वानुमान महाशाखाले अनुमान गरेको छ।
मधेश प्रदेशका अधिकांश जिल्लामा शनिबारसम्म प्रदेशको मौसम प्रभावित भई मध्यमदेखि अति भारी वर्षा हुने र त्यसका कारण बाढी तथा डुबानको उच्च जोखिम छ।
सप्तकोशी, बागमती, कमला, रातु, लखनदेही, रातु खतराको तहभन्दा माथि पुग्ने अनुमान छ।
मुख्यमन्त्री सोनलले नदी खोला र नहर नजिक आवातजावत सकभर कम गर्न, घर बाहिर निस्कदा बिजुलीका तार वा पोलहरूबाट टाढा रहन र धानबाली लगायत अन्नबाली नकाट्न र यदि काटेको भए तत्काल भित्र्याउन आग्रह गरेका छन्।
जिल्ला प्रशासन कार्यालय, सुरक्षा निकाय र स्थानीय तहले जारी गर्ने सूचनालाई ध्यान दिएर पालना गर्न मुख्यमन्त्री सोनलले अनुरोध गरेका छन्।
आउन सक्ने विपत्ती सामना गर्न प्रदेश सरकार पूर्ण तयारी अवस्थामा रहेको बताउँदै उनले तीनै तहका सुरक्षा निकायका टोलीहरूलाई सम्भावित जोखिम स्थलमा तयारी अवस्थामा राखिएको बताए।
‘आवश्यक पर्ने डुंगा, लाइफ ज्याकेट र अन्य उद्धार सामाग्रीको भण्डारण सुनिश्चित गरिसकेका छौं,’ उनले भने, ‘संघीय सरकार, विपद जोखिम न्यूनीकरण तथा व्यवस्थापन प्राधिकरण र सम्बन्धित स्थानीय तहसँग निरन्तर समन्वय गरिरहेका छौं।’
यस्तै, उनले सबैलाई जोखिम न्यूनीकरणका लागि आवश्यक तयारीमा रहन र कुनैपनि सहयोग चाहिए सुरक्षा निकायसँग सम्पर्क गर्न अपिल गरे।
मधेश प्रदेशको गृह, सञ्चार तथा कानून मन्त्रालयमा बसेको बैठकले प्रदेशभरि उच्च सतर्कता अपनाउने निर्णय गरेको छ।
प्रभाव कात्तिक १५ गतेसम्म रहने भएकाले नदी तथा खोलामा जलस्तर बढ्ने खतरा भएकाले सो क्षेत्रका जनतालाई सचेत रहनका लागि आग्रह गर्दै विपत आइहालेको खण्डमा चारै सुरक्षा अंग तत्काल परिचालन भएर उद्धारको काम गर्ने निर्णय बैठकले गरेको छ।
बैठकमा विभिन्न मन्त्रालयका सचिवहरू, मधेश प्रदेशका नेपाल प्रहरी, सशस्त्र प्रहरी, राष्ट्रिय अनुसन्धान विभाग तथा नेपाली सेनाका प्रमुख एवं प्रतिनिधिहरू सहभागी थिए।
-copy-1761394385.jpg)
-1746009348.jpg)
