कास्कीको अन्नपूर्ण आधार शिविर क्षेत्रमा बाक्लो हिमपात भएको छ। त्यस क्षेत्रमा सोमबार रातिदेखि नै बाक्लो हिमपात भएको थियो। यसअघि त्यस क्षेत्रमा हल्का हिमपात भए पनि यो मौसममा पहिलोपटक भारी हिमपात भएको स्थानीयले बताएका छन्।
तिहार र त्यसपछि लामो बिदा भएकाले यसलाई सदुपयोग गर्दै आन्तरिक पर्यटक र बाह्य पदमार्गीहरू अन्नपूर्ण र माछापुच्छ्रे आधार शिविर गएका थिए।
हिमपातका कारण पदयात्रामा कठिनाइ भएको यात्रुहरूले बताएका छन्। केही पदयात्री कठिनाइ चिर्दै आधार शिविर पुगेर फर्किएका छन्। कोही बीच बाटाबाटै फर्किएका छन्।
अन्नपूर्ण आधार शिविर क्षेत्रमा सोमबार बेलुकादेखि हिमपात भएको छोम्रोङ पर्यटन व्यवस्थापन समितिका अध्यक्ष जगनरास गुरूङले जानकारी दिए। तिहारलगत्तै यस क्षेत्रमा पदयात्रा लागि आउने पर्यटकको सङ्ख्या उत्साहजनक रूपमा बढेको जानकारी दिँदै उनले विदेशीभन्दा स्वदेशी पर्यटकको आकर्षण बढिरहेको बताए।
हिउँ सामान्य परेका कारण पदयात्रामा आएका पर्यटकलाई कुनै असहजता भने नभएको उनको भनाइ छ। तिहारलगत्तै अन्नपूर्ण क्षेत्रमा पदयात्राको क्रम बढेको अन्नपूर्ण संरक्षण क्षेत्र आयोजनाका प्रमुख रविन कडरियाले पनि जानकारी दिए।
कास्कीतर्फको अन्नपूर्ण आधार शिविरमा सोमबार पुगेका पर्यटक तल झरिसकेको उनले जानकारी दिए।
‘कास्कीको अन्नपूर्ण आधार शिविरदेखि माछापुच्छ्रे आधार शिविरसम्म हिउँ परेको छ,’ उनले भने, ‘त्यहाँभन्दा तल्लो क्षेत्रमा पानी परेको छ, पदयात्रामा जाने पर्यटकलाई सजगता अपनाउन आग्रह गरेका छौं।’
तिहारयता अन्नपूर्ण आधार शिविरमा आउने पर्यटकमध्ये ८० प्रतिशत आन्तरिक र २० प्रतिशत विदेशी रहेको छोम्रोङ पर्यटन व्यवस्थापन समितिका सचिव दिलीप गुरूङले जानकारी दिए।
यसैबीच पश्चिमी वायुका साथै अरब सागरबाट उत्पन्न न्यून चापीय प्रणालीका कारण मौसम बदली हुँदा मनाङ र मुस्ताङमा आज भारी वर्षा भएको छ।
जल तथा मौसम विज्ञान विभागका सूचना अधिकारी दिनकर कायस्थका अनुसार आज मनाङ र मुस्ताङमा भारी वर्षा अभिलेख भएको हो।
विभागका अनुसार मनाङको चामेमा पछिल्लो २४ घण्टामा ६४.४ मिलिमिटर वर्षा भएको छ। त्यसैगरी मुस्ताङको जोमसोममा ५१.२ मिलिमिटर वर्षा भएको छ। पचास मिलिमिटरदेखि १०० मिलिमिटरसम्मको वर्षालाई भारी वर्षामा मापन गर्ने गरिन्छ।
अन्य धेरै जिल्लामा मध्यमसम्म वर्षा भएको विभागले जनाएको छ। अहिले ३ः४० बजेसम्मको अभिलेख अनुसार डोल्पाको दुनैमा ३६, जुम्लामा १३ मिलिमिटर वर्षा भएको छ।
पछिल्लो १२ घण्टामै बागलुङ, पर्वतमा २४ मिलिमिटर, प्यूठानमा २१.८ मिलिमिटर, सिन्धुपाल्चोकमा २९.६ मिलिमिटर वर्षा भएको छ। चितवनमा २३ र लमजुङमा २७ मिलिमिटर वर्षा भएको छ। हिमाली क्षेत्रमा बाक्लो हिमपात भएको छ भने तल्लो भेगमा वर्षा भइरहेको विभागले जनाएको छ। काठमाडौं उपत्यकामा चिसो बढे पनि वर्षा भने हल्का भएको छ।
आज राति बागमती, गण्डकी र कर्णाली प्रदेशका उच्च पहाडी तथा हिमाली भू–भागका केही स्थानमा भारी हिमपात र वर्षाको सम्भावना रहेको जनाइएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणकी प्रवक्ता शान्ति महतले वर्षा र हिमपात जारी रहेकाले आवश्यक सावधानी अपनाउन सबैमा अनुरोध गरेका छन्।
तस्बिरहरू:
-1761647992.jpg)
-1761647992.jpg)
-1761647991.jpg)
-1761647991.jpg)
-1761647990.jpg)
-1761647990.jpg)
-1761647989.jpg)
-1761647989.jpg)
-1761647989.jpg)
-1761647988.jpg)
-1761647988.jpg)
-1761647987.jpg)
-1761647987.jpg)
सबै तस्बिर: पुरूषोत्तम पोखरेल
-1761647989.jpg)
-copy-1761394385.jpg)
-1746009348.jpg)
