कैलालीमा एक जना युवाको हत्या भएको छ।
जिल्लाको घोडाघोडी नगरपालिका–८ जरैका २८ वर्षीय केशरबहादुर बुढाको हत्या भएको हो। केही दिन पहिले मात्रै उनी दसैं मनाउन भारतबाट घर फर्किएका थिए।
उनको हत्या आरोपमा घोडाघोडी–८ का १९ वर्षीय गंगा बुढा क्षेत्री र १८ वर्षीय बलबहादुर विकलाई पक्राउ गरी प्रहरीले हिरासतमा राखेको छ।
हत्यापछि गंगा र बलबहादुर केशरबहादुरको टाउको बोकेर आफैं प्रहरी चौकी पुगेका थिए।
मध्य रति दुई जना युवा सुखडस्थित प्रतिखेत प्रहरी पोस्टमा टाउकोसहित पुगेका थिए। स्रोतका अनुसार हत्यापछि छिनाएको टाउको आफैंले बोकेर उनीहरू झन्डै एक घन्टा पैदल हिँडेर प्रतिखेत प्रहरी पोस्ट पुगेका थिए।
इलाका प्रहरी कार्यालय सुखडका प्रमुख डिएसपी रमेशदत्त अवस्थीले मध्यराति मानिसको टाउको हातमा लिएर आएका दुई जनालाई देखेपछि प्रहरीले सोधपुछ गरेको बताएका छन्।
त्यस क्रममा उनीहरूले एक जनाले निहुँ खोजेपछि उसको हत्या गरी टाउको बोकेर आएको बताएका थिए। त्यसपछि प्रहरीले उनीहरूलाई नियन्त्रणमा लिएको थियो।
शुक्रबार राति मदिरा सेवन गर्ने क्रममा उनीहरूबीच आपसी विवाद भएपछि घरबाट हँसिया ल्याएर दुई जना मिली केशरबहादुरको घाँटी रेटेर हत्या गरेको भन्ने कुरा प्रारम्भिक अनुसन्धानबाट खुलेको जिल्ला प्रहरी प्रवक्ता डिएसपी राजकुमार सिंहले बताए।
‘सँगै मदिरा पिएपछि विवाद भएको र त्यसपछि नजिकै घरबाट हँसिया लिएर आएर एक जनाको घाँटी रेटेर हत्या गरेका छन्,’ सिंहले भने, ‘हत्या पछि उनीहरू आफैं टाउको बोकेर प्रहरीमा आत्मसमर्पण गर्न आएका हुन् भन्ने जानकारी छ।’
मध्य राति मान्छेको टाउको बोकेर दुई युवा प्रहरी चौकीमा पुग्दा प्रहरी पनि झस्किएका थिए। शरीर भने घटनास्थलमै रहेको प्रहरी अधिकारीले बताएका छन्।
हत्या गरिएका केशरबहादुरको टाउको भने इलाका प्रहरी कार्यालय सुखडमा राखिएको छ।
प्रहरीका अनुसार हत्या गरिएका केशरबहादुरका घरपरिवारका सदस्य सुर्खेतदेखि कैलाली आउँदै छन्।
केशरबहादुरको घर कैलाली र सुर्खेत दुवै ठाउँमा थियो। केशरबहादुरकी श्रीमतीसहित परिवारका सदस्यलाई बोलाइएको प्रहरीले जानकारी दिएको छ।
केशरबहादुरको हत्या राति सवा ११ बजेपछि भएको अनुमान गरेको छ। घटनाबारे थप अनुसन्धान हुन बाँकी रहेको प्रहरीले जानकारी दिएको छ।
-1746009348.jpg)
