राजस्व अनुसन्धान कार्यालय बुटवलले भन्सार छली ल्याएको १६ लाख भन्दा बढीको सामान नियन्त्रणमा लिएको छ।
कपिलवस्तुको शिवराज नगरपालिका–५ चन्द्रौटामा रहेको चिरञ्जीवी खनालको घरमा लुकाई छिपाई राखेको अवस्थामा सशस्त्र प्रहरी बल कपिलवस्तुको टोली सहित पुगेको राजस्वको टोलीले उक्त सामान बरामद गरेको हो।
राजस्व अनुसन्धान कार्यालय बुटवलका प्रमुख सुवास श्रेष्ठले केही व्यापारीहरूले भारतबाट भन्सार छली पैठारी गरेको सामान चिरञ्जीवी खनालको घरमा लुकाई छिपाई गोदाम गरी राख्ने गरेको र सूचनाका आधारमा छापा मार्दा उक्त सामान फेला परेको बताए।
'भन्सार छली गरी ल्याएको २३ बोरा सामान हामीले बरामद गरेका छौँ तर, के सामान हो भन्ने खुलेको छैन। कपडा जस्तो छ कार्यालय पुर्याएपछि खोल्छौं,' श्रेष्ठले भने।
'घरधनी चिरञ्जीवी खनाललाई २४ घण्टाभित्र कार्यालयमा हाजिर हुन पत्राचार गरेका छौं, उहाँ आएपछि कसको सामान हो भन्ने खुलाउनु होला,' उनले थपे।
श्रेष्ठले उक्त घरको गोदाममा शिवराज नगरपालिका वडा नं ३ खरेन्द्रपुर ठेगाना रहेको शंभु क्रिएशनको बिलको ठेली भेटिएकोले उक्त घरमा चोरी पैठारीका सामान गोदाम गरी राख्ने र शंभु क्रिएशनकै नाममा वैधानिक बनाएर सामान बजार पठाउने गरिएको हुन सक्ने बताए।
राजस्व अनुसन्धान कार्यालयले कृष्णनगर भन्सारबाट चोरी पैठारी गरी ल्याएका सामानहरू पटक पटक बरामद गर्दै आएको छ।
-1746009348.jpg)
