अविरल वर्षापछिको बाढीले मोरङका विभिन्न स्थानमा ठूलो क्षति पुर्याएको छ।
बाढी र डुबानका कारण ४०४ घर प्रभावित हुँदा १ हजार ७६४ जना विस्थापित भएका छन्। बाढीमा परी एक जनाको मृत्यु भएको प्रहरीले जनाएको छ।
विराटनगर महानगरपालिका–१६ सुगरमिल नजिकको खाल्डोमा भारत घर भइ त्यहीँ डेरा गरी बस्ने ३५ वर्षीया अनिता राउतको पानीको भेलले बगाएर मृत्यु भएको जिल्ला प्रहरी कार्यालय मोरङले जनाएको छ।
बाढीले महानगरका विभिन्न वडामा क्षति पुर्याएको छ। विराटनगर–१२ बखरीमा ७७ घर डुबानमा परी ३५० जना प्रभावित भएका छन्। रतुवामाई–५ कुमारटोल, महराजथान र मुसरभिट्टा क्षेत्रमा ५९ घर डुबानमा परी २८० जना प्रभावित भएका छन्।
सुनबर्षी–३ बाहुनटोलमा ६० घर डुबानमा परेका छन्, जसबाट २५० जना प्रभावित भएका छन्।
त्यस्तै, विराटनगर–१६ दरैया बस्तीमा ७७ घर डुबानमा परेपछि ३८१ जनाको उद्धार गरिएको छ। विराटनगर–२ पूर्वटोलका ३५ घर डुबानमा परेका छन् भने कटहरी–१ बखु टोलका ३५ घर डुबानमा परी १०० जना प्रभावित भएका छन्।
खोलाले पनि विभिन्न स्थानमा कटान गरेको छ। सुनबर्षी–६ कैनिटोल, उर्लाबारी–९ बोडरलाइन र मिक्लाजुङ–६ मलामीटहरामा स्थानीय खोलाले बाँध कटान गरेका छन्। कानेपोखरी–१ बीरटोलमा चिसाङ खोलाले दुई कठ्ठा खेत बगाएको छ प्रमुख जिल्ला अधिकारी इन्द्रदेव यादबले बताए।
उद्धार गरिएका बाढीपीडितहरूलाई विभिन्न विद्यालय, मन्दिर र धर्मशालामा अस्थायी रूपमा राखिएको छ। राहत वितरणमा विराटनगर महानगरपालिका, जीवन विकास संस्था, मारवाडी सेवा समाज र रतुवामाई नगरपालिकाले सहकार्य गरेका छन्।
-1746009348.jpg)
