शुक्रबार रातिदेखि आइतबार बिहानसम्म परेको अविरल वर्षातले बागमती, मधेस र कोशी प्रदेशका अधिकांश सडक अवरूद्ध भए।
बंगालको खाडीबाट भित्रिएको जलवाष्पयुक्त मनसुनी वायु र भारतको उडिसा आसपास विकास भएको न्यूनचापीय प्रणालीले यहाँ सघन वर्षा गराउने देखिएपछि सरकारले शुक्रबार रातिदेखि नै लामो तथा छोटो दुरीका सवारी साधन काठमाडौं भित्रन र बाहिरिन रोक लगाएको थियो।
देशको गण्डकीदेखि कोशी प्रदेसम्म पानी पारेको उक्त प्रणाली आइतबार अपराह्नबाटै बाहिरिइसकेको छ।
तथापि दुई दिन परेको अविरल वर्षातले अझै ८ वटा प्रमुख राजमार्ग अवरूद्ध छन्। नेपाल प्रहरीका अनुसार यी राजमार्गमध्ये केही आजै दिउँसोसम्म खुलिसक्छन् भने केही सञ्चालनमा आउन पाँच–छ दिन पनि लाग्नसक्छ।
बडादसैंको बेला झरी परेसँगै सरकारले राजमार्ग बन्द गराएपछि यात्रुहरू ठाउँठाउँमा रोकिएका छन्। दसैं मनाउन आफन्तकहाँ गएकाहरू उतै अड्किएका छन्। सरकारले राजमार्ग खुलाएसँगै कतिपय फर्कने तयारीमा छन्। कतिपय बाटोमा आउँदै पनि छन्।
देशको संघीय राजधानी काठमाडौं आउने बाटो कस्तो छ भनेर धेरैको चासो हुनसक्छ। चाडबाड मनाएर फर्कनेको संख्या अधिक भएकाले पनि काठमाडौं आउने बाटोको अवस्था के छ भनेर धेरैलाई चासो हुनु स्वाभाविकै हो।
हामीले संघीय सडक सुपरीवेक्षण तथा अनुगमन कार्यालयका प्रमुख शुभराज न्यौपानेलाई काठमाडौं भित्रने प्रमुख सडकहरूको अवस्थाबारे सोधेका छौं।
पोखराबाट काठमाडौं अथवा गण्डकी प्रदेशका विभिन्न जिल्लाबाट पृथ्वी राजमार्ग हुँदै काठमाडौं आउन यो सडक निर्बाध सञ्चालनमा छ। मुग्लिन–मलेखु–नौबिसे–नागढुंगा हुँदै काठमाडौंको यात्रा निर्बाध गर्न सकिने न्यौपानेले बताए।
दुई दिने झरीमा पृथ्वी राजमार्ग र त्रिभुवन राजपथ अन्तर्गत पर्ने काठमाडौं भित्रने र बाहिरिने मुख्य सडक खासै अवरोध थिएन।
धादिङको जवाङ खोला, मौवा खोलामा पहिरो खसे पनि तुरून्तै पहिरो पन्छाएर सञ्चालनयोग्य बनाइएको थियो।
मुग्लिन–नारायणगढ सडक खण्ड पनि अहिले बिनाव्यवधान सञ्चालनमा रहेको न्यौपानेले बताए।
‘पछिल्लो झरीअगाडि तुइन खोलामा निकै सुख्खा पहिरो खसेको थियो। अहिले सबैभन्दा राम्रो नै त्यही खण्ड छ,’ उनले भने, ‘त्यहाँ झर्नेजति पहिरो खसिसकेर रोकिएको अवस्था छ।’
यद्यपि त्यो सडक खण्ड भएर यात्रा गर्दा सावधानी अपनाउनुपर्ने, नजिकैको सुरक्षाकर्मीसँग सडकको अवस्थाबारे जानकारी लिँदा उपयुक्त हुन्छ।
धादिङको धार्के हुँदै सीतापाइला निस्कने नागढुंगाको विकल्पको सडक पनि निर्बाध सञ्चालनमा रहेको न्यौपानेले बताए।
‘दुई दिनको लगातारको झरीले बाटो हिलो हुनसक्छ। सवारी सञ्चालनमा केही कठिनाइ हुनसक्छ तर रोकिएर बस्नुपर्ने अवस्था छैन,’ उनले भने।
उत्तरी मकवानपुरको चित्लाङ हुँदै चन्द्रागिरि निस्कने भित्री सडक पनि सञ्चालनमै रहेको उनले बताए।
उनका अनुसार त्यो खण्डमा साना सवारी साधन गुड्न भने कठिन छ। कच्ची सडक र बाटो हिलाम्य हुँदा, कार, ट्याक्सी आदि साना सवारी साधन लिएर उक्त खण्डबाट यात्रा नगर्दा नै उपयुक्त हुने उनले बताए।
हेटौंडाबाट बल्खु निस्कने सडक इन्द्रसरोवर गाउँपालिका–३ सिस्नेरी बजारमा अवरूद्ध छ। त्यसको वैकल्पिक सडक पनि एकतर्फी भएकाले यात्रा कष्टकर हुनसक्ने नेपाल प्रहरीले जानकारी दिएको छ।
मदन भण्डारी राजमार्ग, हेटौंडा हुँदै ललितपुर निस्कने कान्ती लोकपथ पनि अवरूद्ध रहेको न्यौपानेले बताए। उनका अनुसार कान्ती लोकपथअन्तर्गत् बकैया गाउँपालिका–११ घट्टेपाखा, भीमफेदी गाउँपालिका–८ बगुगा खोलामा पूर्णरूपमा अवरूद्ध छ।
‘अबको एक घन्टाभित्र हामी कान्ती लोकपथ खुलाउने गरी काम गरिरहेका छौं,’ उनले भने।
त्यसैले कान्ती लोकपथ भएर तत्काल यात्रा गर्न सम्भव छैन। सोमबार दिउँसो यात्रा गर्ने सोच बनाइराखेकाहरूलाई सुरक्षाकर्मीसँग समन्वय गरेर मात्रै यात्रा गर्दा सहज हुने देखिन्छ।
उत्तरी नाका हुँदै काठमाडौं भित्रने त्रिशूली–गल्छी सडक सञ्चालनमा रहेको न्यौपानेले बताए।
छहरे–टोखा निस्कने उत्तरतिरको बाटो पनि सञ्चालनमै छ। पासाङ ल्हामु राजमार्ग भने गोसाइँकुण्ड–२ को तीन स्थान र सोही गाउँपालिकाको ५ नम्बर वडा स्याफ्रुबेँसीमा अवरूद्ध छ। त्यसो त नेपाल–चीन नाका केरूङको मितेरी पुल बगाएकाले त्यहाँ पनि अवरूद्ध छ।
पूर्वी भेगबाट काठमाडौं भित्रने अर्को प्रमुख सडक बिपी राजमार्ग १६ भन्दा बढी स्थानमा अवरूद्ध छ।
बिपी राजमार्गको झन्डै साढे पाँच किलोमिटरभन्दा बढी खण्ड नदीले कटान गरेको छ। उक्त खण्ड सञ्चालनमा आउन कम्तीमा पाँच दिन लाग्ने देखिएको छ।
यो बाटोको विकल्पको रूपमा सिन्धुलीको खुर्कोट, मन्थली, चरिकोट हुँदै अरनिको राजमार्ग छिचोल्न सकिने सडक पनि छ। अरनिको राजमार्गसम्म यो बाटो निर्बाध सञ्चालनमा छ।
अरनिको राजमार्गको खावा खण्डमा बाटो एकतर्फी रहेको न्यौपानेले बताए। उनका अनुसार त्यहाँ सुख्खा पहिरो खस्ने समस्याले केही अवरोध देखिए पनि काठमाडौं आउन सकिन्छ।
-1748241948.jpg)
-1746009348.jpg)
