कर्तव्य ज्यान मुद्दामा कारागारमा सजाय भुक्तान गरिरहेको अवस्थामा भागेका एक युवक फेरि सोही आरोपमा पक्राउ परेका छन्।
दाङको तुलसीपुर उपमहानगरपालिका –५ रानीजरुवाका २२ बर्षीय ‘पन्छी’ भनिने खिमबहादुर विकलाई कर्तव्य ज्यान मुद्दामा अदालतले २५ वर्ष कैद सजाय तोकेको थियो।
अदालतबाट तोकिएको सजाय भुक्तान गरिरहेका खिमबहादुर भदौ २४ गते जेनजी आन्दोलनका क्रममा तुलसीपुर कारागारबाट भागेका थिए।
जेलबाट भागेका उनले फेरि तुलसीपुर – ५ रानी जरुवाका ५३ वर्षीय एक व्यक्तिमाथि धारिलो हतियार प्रहार गरेका छन्।
घटना असोज ११ गतेको हो।
बेलुकी ८ बजे उनले आफूसँगै अरू २ जनालाई पनि साथ लिएर ती व्यक्तिमाथि धारिलो हतियार प्रहार गरेको इलाका प्रहरी कार्यालय तुलसीपुरका प्रवक्ता प्रहरी निरीक्षक सूर्य राना मगरले जानकारी दिए। हतियार प्रहारबाट उनी गम्भीर घाइते भएका थिए।
पीडितले असोज १५ गते खिमबहादुरसहितका ब्यक्तिहरुबिरुद्ध ज्यान मार्ने उद्योगमा जाहेरी दिएका थिए। त्यसपछि प्रहरीले जिल्ला अदालत घोराहीबाट खिमबहादुरबिरुद्ध पक्राउ पुर्जी लिएर खोजी थालेको थियो ।
खिमबहादुरको खोजी गर्ने क्रममा दंगीशरण गाउँपालिका – २ सातखुटी गाउँमा लुकिछिपी बसेको अवस्थामा शनिबार बेलुकी पक्राउ गरिएको प्रहरी निरीक्षक मगरले बताए।
पक्राउ परेका खिमबहादुर र उनको समूहमाथि थप अनुसन्धान भइरहेको प्रहरी निरीक्षक मगरले जानकारी दिए।
-1746009348.jpg)
