निरन्तरको वर्षाका कारण विभिन्न ठाउँमा बाढी पहिरोले क्षति पुर्याएको छ।
विशेषगरी कोशी, मधेस र बागमती प्रदेशमा ठूलो क्षति पुगेको छ। विभिन्न ठाउँहरूमा राजमार्गहरू अवरुद्ध भएका छन्।
कोशी प्रदेश
पहिरोले इलाममा ठूलो मानवीय क्षति भएको छ। आइतबार बिहानसम्म पहिरोले कम्तीमा १८ जनाको ज्यान लिइसकेको प्रहरीले जनाएको छ।
कोशी प्रदेश प्रहरी प्रवक्ता एसएसपी दीपक पोखरेलले दिएको जानकारी अनुसार जिल्लाका विभिन्न स्थानमा खसेको पहिरोले कम्तीमा १८ जनाको ज्यान गएको छ।
इलामका सुर्योदय, देउमाई, माङसेवुङ, फाकफोकथुम र इलाम नगरपालिकामा पहिरोका कारण ठूलो जनधनको क्षति भएको स्थानीय प्रशासनले जनाएको छ।
सुर्योदय नगरपालिका–१ मानेभञ्ज्याङमा खसेको पहिरोमा ५ जनाको मृत्यु भएको प्रहरीको भनाइ छ।
त्यस्तै, माङसेवुङ गाउँपालिका–१ पाटीगाउँमा ३ जना, देउमाई नगरपालिका–५ धारेमा १ जना र सोही नगरपालिकाको धुसुनेमा २ जनाको मृत्यु भएको छ।
यस्तै, फाकफोकथुम गाउँपालिका–३ रातमाटेमा १ जनाको मृत्यु भएको छ भने इलाम नगरपालिका–५ घोसगाउँमा ६ जनाको ज्यान गएको प्रहरीले पुष्टि गरेको छ।
अहिले पनि केही स्थानमा पहिरो खसेको खबर आइरहेको छ। उद्धार तथा राहत कार्यमा सशस्त्र प्रहरी, नेपाल प्रहरी र स्थानीय बासिन्दा खटिएका छन्।
लगातारको वर्षाका कारण इलामका अधिकांश ग्रामीण सडक अवरुद्ध छन् र जोखिम क्षेत्रका बासिन्दालाई सतर्कता अपनाउन प्रशासनले आग्रह गरेको छ।
कोशी प्रदेशका अन्य क्षेत्रमा पनि बाटो अवरुद्ध भएको छ। अन्य विवरणहरू संकलनको क्रममा रहेको सरकारी प्रहरी अधिकारीहरूले बताएका छन्।
कनकाई माईको बाढीले सडकमा क्षति पुर्याएपछि हुलाकी राजमार्ग पनि अवरुद्ध बनेको छ।
जिल्ला प्रहरी कार्यालय झापाले जारी गरेको सार्वजनिक सूचनामा उल्लेख भए अनुसार झापा गाउँपालिका २ मा हुलाकी राजमार्ग बाढीले भत्काएको छ। सो स्थानमा दुई सयभन्दा बढी घरहरु बाढीको डुबानमा परेका छन्। झापा प्रहरीका अनुसार झापा गाउँपालिका क्षेत्रमा मात्रै ५ सय घरपरिवार डुबानमा परेका छन्। स्थानीयबासीलाई सुरक्षित ठाउँमा सार्ने क्रम चलिरहेको छ।
मधेस प्रदेश
मधेश प्रदेशमा पर्सा र रौतहट जिल्लामा बढी क्षति भएको छ।
वीरगञ्ज बसपार्कमा रहेको प्रहरी कार्यालय डुबानमा परेको छ। वीरगञ्ज महानगरपालिका-११ को केही क्षेत्र डुबानमा परेको छ। यहाँबाट ३८ घर परिवार सुरक्षित स्थानमा सारिएको प्रहरीले जनाएको छ।
धोविनी गाउँपालिका-५ बाट पनि २ घर परिवार सुरक्षित स्थानमा सारिएको छ।
जगरनाथपुर गाउँपालिका-३ बाट ५ परिवार सारिएको छ।
बौद्धमाई लगायतका स्थान डुबानमा परेका छन्। बौद्धमाईबाट १४ घरपरिवार सारिएको प्रहरीले जनाएको छ।
रौतहटमा १८ गते चट्याङ लागेर तीन जनाको मृत्यु भएको छ।
रौतहटको चन्द्रपुरस्थित पूर्वपश्चिम राजमार्गमा लस्का अवरोध भएको छ। राति १ बजेदेखि पानीको बहाव बढेर लस्का अवरुद्ध भएको हो।
महोत्तरीको बर्दिवास नगरपालिका वडा ५ मा बाढीका कारण रूख लडेर राजमार्ग एकतर्फी रूपमा मात्रै सञ्चालन गर्न सकिने अवस्था छ। अन्य ठाउँको विवरण संकलनको क्रममा रहेको प्रहरीले जनाएको छ।
बागमती प्रदेश
काठमाडौं महानगरपालिका–१४ कोहिनुर हाउजिङ नजिकैको करखुसी खोला किनारामा सडक कटान भएको छ। बाटो भासिएर क्षति पुगेको छ। यसरी सडक भासिएको कारण २८ मानिसहरू प्रभावित भएका छन्। यसमध्ये ५०० जना सुरक्षित स्थानमा सारिएको छ।
भक्तपुरमा हालसम्म मानवीय क्षति नभएको बताइएको छ। प्रहरी निरीक्षक दाताराम अधिकारीका अनुसार सागवारीमा तीन वटा घर डुबानमा परेको थियो। मध्यपुर ठिमी नगरपालिका–३ मा डुबानमा १२ जनाको उद्धार गरिएको छ।
चाँगुनारायण नगरपालिका–२ दुवाकोटमा पहिरो जाने सम्भावना देखिएको छ। चाँगुनारायण–७ मा पनि बाटो भासिने जोखिम भएकाले प्रहरी र वडाको समन्वयमा त्रिपालमुनी राखिएको छ।
चाँगुनारायण वडा ६ को तेलकोटमा ढिस्को खसेर सडक अवरुद्ध भएको थियो। अहिले भने हटाइएको छ। ६ नम्बरमै राजकुमार बाँस्तोलाको आँगन भत्किएर जोखिम भएको जनाइएको छ। वडा ८ मा जोखिमयुक्त बस्तीहरूलाई सुरक्षित स्थानमा जान अनुरोध गरिएको छ।
साँगामा बाटो अवरुद्ध भएकोमा लेदो पन्छ्याउने काम सकिएको छ। अहिले अत्यावश्यक कामका सवारीसाधनलाई चल्ने प्रहरीले जनाएको छ।
ललितपुर जिल्लामा एक घरको पछाडि रहेको आँगन भत्किँदा तीन जना घाइते भएका छन्। गोदावरी नगरपालिका–१४ ठेँबमा विकास अधिकारीको घर पछाडि रहेको पर्खाल भत्किँदा घाइते भएका हुन्।
ललितपुरमा मानवीय क्षति नभएको बताइएको छ।
काठमाडौं छिर्ने राजमार्गहरूमा विभिन्न ठाउँमा सडक अवरुद्ध छ।
बिपी राजमार्ग, मंगलटारमा पाँच–छ ठाउँमा। सिन्धुलीको सडक भासिएको छ।
मुग्लिन–पृथ्वी राजमार्ग एकतर्फी सञ्चालनमा छ। अरनिको राजमार्ग पनि एकतर्फी सञ्चालनमा छन्। कान्ति लोकपथमा बागमती पुल सडक खण्ड अवरुद्ध छ। आज चल्न सक्ने अवस्था नरहेको बताइएको छ।
यता बाह्रबिसेमा चारकिलो र काभ्रेको खावामा पहिरो गएको छ। हेटौंडादेखि काठमाडौं जाने सडकमा पनि समस्या छ। सिस्नेरी खोला बढेको छ।
पासाङ ल्हामु राजमार्ग धुन्चे अगाडि पहिरो गएको छ।
लाङटाङमा चार जना बेपत्ता भएका छन्। लाङटाङमा खोलामा तर्ने क्रममा ह्वात्तै पानीको बहाव आएको थियो। अहिले खोजीकार्य जारी रहेको बताइएको छ।
-1759633786.jpeg)
-1746009348.jpg)
